Papa në Takimin për mbrojtjen e të miturve, lëvdon “gjeninë femërore”
R.SH. - Vatikan
“Nuk është fjala për t’i dhënë gruas funksione më tepër në Kishë – po, kjo është gjë e mirë, por kështu nuk zgjidhet problemi – nënvizoi Papa Françesku. – Duhet integruar figura e saj në Kishë, në mendimin tonë. E duhet menduar edhe Kisha, me kategoritë e mendimit të një gruaje”. Këto ishin fjalët e Atit të Shenjtë, i cili e falenderoi Linda Ghisoni-n jo vetëm për relacionin e saj, por edhe për përgjigjen që i dha njërës prej pyetjeve nga asambleja.
Kisha flet për veten
“Duke dëgjuar doktoreshën Ghisoni, dëgjova Kishën që fliste për veten – theksoi Papa. – Të gjithë ne folëm për Kishën, në të gjitha relacionet. Por kësaj radhe, fliste vetë Kisha”. “Nuk është vetëm çështje stili – vijoi – është gjenia femërore, që pasqyrohet në Kishë, e cila është grua. Të ftosh një grua të flasë nuk do të thotë të hysh në mënyrën e veprimit të ndonjë feminizmi kishtar, sepse në fund të fundit, çdo feminizëm përfundon në një lloj maskilizmi me fustan”.
Logjika e një nëne
“Jo. Kur fton një grua të flasë mbi plagët e Kishës do të thotë ta ftosh Kishën të flasë për veten, për plagët e saj – nënvizoi Papa. – E ky, mendoj se është hapi, që duhet të bëjmë me forcë: gruaja është imazhi i Kishës, e cila është grua, është nuse, është nënë. Një stil… Pa këtë stil do të flasim për Popullin e Zotit, por si organizatë - ndoshta sindikatë – por jo si një familje e lindur nga Kisha Nënë”. Sipas Françeskut, “logjika e mendimit të zonjës Ghisoni ishte pikërisht ajo e një nëne, e, përfundoi me tregimin e asaj që ndodh kur një grua nxjerr në dritë fëmijën. O mister femëror në Kishë, që është nuse e nënë”.