Papa Françesku lutet për viktimat e trafikut të qenieve njerëzore
R. SH. - Vatikan
Në përfundim të lutjes së Engjëllit të Tënzot, dy ditë pas Ditës V Botërore kundër trafikut të njerëzve, kremtuar me rastin e kujtimit liturgjik të Shën Gjyzepina Bakhitës, Papa Françesku u drejtoi qeverive një thirrje të fuqishme, që t’i përballojnë me vendosmëri shkaqet e trafikut të njerëzve e t’i mbrojnë viktimat. Por - theksoi - nuk duhet harruar edhe se “të gjithë munden e duhet të bashkëpunojnë, duke i denoncuar rastet e shfrytëzimit dhe të skllavërimit të burrave, grave e fëmijëve”.
Falënderim rregulltareve
“I falënderoj të gjithë ata, që luftojnë në këtë front”- theksoi fort Papa Françesku - duke kujtuar në mënyrë të veçantë, rregulltaret e shumta, të angazhuara në frontin e ndeshjes me këtë fenomen kriminal.
Të bashkuar, kundër trafikut
“Së bashku, kundër trafikut!”, ishte motoja e këtij viti. E Papa i ftoi të gjithë “të bashkojnë forcat, për ta fituar luftën kundër trafikut”. E forca jonë është lutja. Ajo e mbështet angazhimin tonë të përbashkët - kujtoi Françesku - duke i ftuar besimtarët të thonë një lutje kushtuar Shën Gjyzepina Bakhitës, shitur skllave në Sudan, nga fundi i 800-tës e më pas, rregulltare në Veneto.
Lutja drejtuar Shën Gjyzepina Bakhitës
“Po të lutemi, ty, Shën Gjyzepinë, t’i ndihmosh të gjithë ata, që kanë rënë në kurthin e skllavërisë e, në emër të tyre, të ndërmjetësosh pranë Zotit të Mëshirës, që t’ua copëtojë zinxhirët e burgut!”.
Jezusi, model feje e shprese për viktimat
“Zoti pastë mëshirë e i liroftë të gjithë ata, që kërcënohen, plagosen e keqtrajtohen nga trafiku i njerëzve - u lut, së bashku me besimtarët, Papa. - E Shenjtja, që e provoi mbi kurrizin e vet trafikun, ndërmjetësoftë pranë Atij të Lumit t’i lehtësojë ata, që shpëtojnë gjallë nga kjo skllavëri e t’i mësojë ta shikojnë Jezusin si model feje e shprese, që kështu të mund t’u shërohen plagët”.
Hapini sytë, për të parë plagët
“Të lutemi të ndërmjetësosh për ne të gjithë - vijoi lutja drejtuar Shenjtores pajtore - që të mos na pushtojë indiferenca, por t’i hapim mirë sytë, për të parë mjerimin dhe plagët e vëllezërve e të motrave tona të shumta, që humbën lirinë dhe dinjitetin e ta dëgjojmë britmën e tyre për ndihmë! Amen!”.