Takimi katolikë-anglikanë. Leicester, kryeqytet i ekumenizmit
R. SH. - Vatikan
Në Leicester, qytet në qendër të Anglisë, me traditë të rëndësishme dialogu ndërfetar, sot e nesër, 16 e 17 janar, pesëdhjetë ipeshkvij, gjysma anglikanë e gjysma katolikë, po takohen për dy ditë bashkëjetese ekumenike. Eshtë takim, që përsëritet çdo dy-tre vjet, duke u krijuar pjesëmarrësve mundësi t’i thellojnë marrëdhëniet e miqësisë, të nderimit e të bashkëpunimit - shpjegon, për Agjencinë Sir, i nderuari Jeremy Worthen, sekretar për marrëdhëniet ekumenike pranë “Këshillit për unitetin e të krishterëve”, ent i Kishës së Anglisë, që merret me përmirësimin e marrëdhënieve ndërmjet Kishave të ndryshme të krishtera. “Sivjet na takon ne, anglikanëve, t’i organizojmë këto dy ditë, me porta të mbyllura, në të cilat po marrin pjesë, përveç ipeshkvijve, edhe përfaqësues të zyrave të shtypit dhe të personelit administrativ”.
Dialogu, një hap tjetër
Takimet nisën kur dokumenti “Të rritemi së bashku në unitet e mision”, hartuar nga Komisioni ndërkombëtar “Larcuum”, që promovon marrëdhëniet baritore ndërmjet dy Kishave, rekomandoi “takime të rregullta të ipeshkvijve të të dyja palëve, për të thelluar besimin dhe miqësinë në frymën e dashurisë së përbashkët ndaj Krishtit”.
Programi
Në Leicester ipeshkvijtë katolikë e anglikanë do të luten së bashku. Lutjet filluan sot, sapo arritën të ftuarit, me një çast të kryesuar nga anglikanët, për t’u takuar, pastaj, në mbrëmje, në katedralen e Leicester-it, për traditën e evensong, uratëve të mbrëmjes – shpjegon Worthen.
Nesër, më 17, ipeshkvijtë katolikë do të kremtojnë një meshë në kishën e manastirit domenikan të Holy Cross (Shëna Krygjës), në qendër të qytetit, në të cilën ipeshkvijtë anglikanë janë të lirë të marrin pjesë, nëse dëshirojnë. Lutja përfundimtare e mesditës do të kryesohet nga Kisha e Anglisë, në qendrën e konferencave, pranë katedrales, ku zhvillohet takimi. Me vlerë, këto takime, që u krijojnë ipeshkvijve mundësinë të njihen e të flasin së bashku.
Teologjia e ekumenizmit receptiv
Në qendër të Takimit, Deklarata e Komisionit III Ndërkombëtar anglikano-katolik(Arcic), titulluar: “Ta bëjmë rrugën së bashku, duke mësuar të jemi Kishë. Lokale, rajonale, universale”, me të cilën përurohet metoda e ekumenizmit receptiv, domethënë, që kuptohet lehtësisht. E kjo do të thotë të shqyrtosh çka u la pas dore ose u nënvleftësua në traditën tënde, ndërsa u trajtua më mirë në traditën tjetër. Eshtë metodë e suksesshme, e përdorur në mbarë botën, që krijon mundësinë për t’i shikuar me sy kritik kufizimet tona. Një shembull mund të jetë fakti se katolikët janë më të vëmendshëm në nivelin lokal - përfundon i nderuari Worthen.