Papa në Engjëllin e Tënzot: Jezusi e bekon familjen njerëzore
R. SH. - Vatikan
Gjatë lutjes së parë të Engjëllit Tënzot të vitit të ri 2019, Papa tha: "Jezu Krishti, Shpëtimtari i botës, është Bekim për çdo person dhe për të gjithë familjen njerëzore, Ai është burim i hirit, mëshirës dhe paqes. Politika është e mirë deri në masën që çdokush e bën pjesën e tij në shërbim të paqes"
Prandaj, “si barinjtë e Betlehemit, vijojmë t’ia ngulim sytë Nënës së Shenjtë të Zotit e Foshnjës, që mban në krahë. E kështu, duke na treguar Jezusin, Shëlbuesin e botës, ajo, Nëna, na bekon”. Këto, fjalët e para të Papës në lutjen e Engjëllit të Tënzot sot, dita e tetë pas Krishtlindjes, kur Kisha kremton Nënën e Shenjtë të Zotit e me Të… :
“Bekon udhën e çdo burri e të çdo gruaje në këtë vit, që sapo filloi e që do të jetë i mirë në atë masë, me të cilën secili nesh do ta pranojë mirësinë e Zotit, të cilën Jezusi erdhi t’ia sjellë botës”.
Në qendër të vëmendjes në këtë lutje të parë të Vitit 2019 drejtuar Krishtit e Nënës së Tij hyjnore, Papa e vuri kryesisht theksin mbi bekimin e Zotit. Ky bekim është në qendër të urimeve, që shkëmbejmë këto ditë. Ky i jep kuptim ditëve, që na presin. E edhe vetë liturgjia përsërit sot bekimin tejet të lashtë, të cilin ua drejtonin popullit priftërinjtë izraelitë. Bekimi më i bukur për secilin prej nesh, në këtë ditë të parë të Vitit të Ri 2019:
Bekimi më i bukur, për secilin prej nesh
“Zoti të bekoftë e të ruajtë! Të shndritët me fytyrën e vet e pastë mëshirë për ty! E sjelltë Zoti fytyrën e vet kah ti e të dhashtë paqe”. (Nm 6, 24-26)
Prifti e përsëriste tri herë rresht emrin e Zotit, duke shtrirë duart kah populli i mbledhur. Kështu emri i Zotit pushonte mbi çdo njeri, mbi çdo familje, mbi çdo bashkësi, për t’u dhënë forcën, mëshirën, paqen, që gurrojnë prej Tij.
Fytyra e Zotit – në Jezu Krishtin
Sipas shkrimeve Shenjte, fytyra e Zotit - kujtoi Papa - është e padukshme për njeriun! Askush nuk mund ta shohë e të mbetet i gjallë. E kjo tregon transhendencën e Zotit, madhërinë e pafundme të lumnisë së Tij. Ashtu si dielli, që nuk mund të shihet, rrezaton hirin e vet mbi çdo krijesë. Por - vijoi të kujtojë Papa në Engjëllin e Tënzot - kur u përmbush koha, Zoti u dëftua në fytyrën e një njeriu, Jezusit, “lindur nga gruaja”.
Ikona e Solemnitetit të sotëm
E pikërisht këtë grua, në qendër të festës së sotme, kujtoi Papa: ikonën e Nënës Shenjte të Zotit, që na tregon Birin, Jezu Krishtin, Shëlbuesin e botës:
“Ai është bekim për çdo njeri e për mbarë familjen njerëzore. Është gurrë hiri, mëshire, paqeje”.
1 janari, Dita Botërore e Paqes
Prandaj - shpjegoi në vijim Papa - Pali VI deshi që 1 janari të ishte Ditë Botërore e Paqes - sot e 52-ta, me temë: “Politika e mirë është në shërbim të paqes”. E, duke e kujtuar këtë, nuk mendojmë se politika u takon vetëm qeveritarëve. Të gjithë përgjigjemi për jetën e “qytetit”, për të mirën e përbashkët. Politika është e mirë në atë masë, me të cilën i shërben secili nesh:
“Na ndihmoftë në këtë angazhim të përditshëm, Nëna e Shenjtë e Zotit”.
Përshëndetje dhe urime
Në përfundim të lutjes, urimi për paqe e prosperitet, duke nisur nga ai drejtuar Presidentit të Republikës Italiane, për të kaluar tek romakët, tek shtegtarët e panumërt, mbledhur në Sheshin e Shën Pjetrit dhe tek përfaqësuesit e nismave të ndryshme për paqen, si ajo titulluar “Paqe në të gjitha trojet”, organizuar sot nga Bashkësia e Shën Egjidit.
Së fundi, bekimi:
“Me ndërmjetësimin e Virgjërës Mari, Zoti premtoftë të bëhemi mjeshtra të paqes çdo ditë të Vitit të Ri. E, mos harroni, ju lutem, të thoni një uratë për mua!”.