Cerca

Vatican News
 Papa takohet me Fondacionin Maronit libanez Papa takohet me Fondacionin Maronit libanez  (Vatican Media)

Papa falënderon Libanin, “zemër mikpritëse” për një milion refugjatë”

Papa Françesku takohet me anëtarët e Fondacionit Maronit, menjëherë pas ipeshkvijve libanezë e të diasporës maronite, në vizitë “ad Limina”. Ati i Shenjtë i falënderoi nxehtësisht për ekulibrin krijues që mbajnë, si vëllezër, ndërmjet të krishterëve e myslimanëve, sunitëve e shiitëve.

R. SH. - Vatikan

Një falënderim i përzemërt drejtuar bashkësisë libaneze, për aftësinë e ruajtjes së ekuilibrit ndërmjet të krishterëve e myslimanëve si dhe për mikpritjen bujare  të më se një milion refugjatëve, nga e gjithë Lindja e Mesme, në flakë. Kështu, me një përshëndetje të shkurtër, i priti Papa Françesku anëtarët e “Fondacionit Maronit” dhe autoritetet e Libanit, në Sallën Klementine, në Vatikan, në përfundim të audiencës me 35 ipeshkvijtë e Kishës patriarkale të Antiokisë së Maronitëve, në shërbim të bashkësisë libaneze, por edhe të besimtarëve të shumtë të diasporës.

Edhe besimtarët, me ipeshkvijtë: “Kështu i njohim më mirë bashkësitë”.

Pas përshëndetjes së kardinalit Bechara Boutros Rai, patriark i Antiokisë së Maronitëve, Papa iu drejtua 50 laikëve të Fondacionit, duke nënvizuar se është ide e mirë, kjo e shoqërimit të ipeshkvijve, sepse kështu - kujtoi - do të mund t’i njohim më konkretisht punët e bashkësisë. E, duke bërë shaka, Papa shtoi; “Kështu besimtarët mund t’i marrin qetësisht nëpër gojë ipeshkvijtë”. “Më thanë se ishin nja 40 vetë, që duheshin përshëndetur - vijoi Françesku - po këtu asistova shumëzimin e libanezëve. Ju falënderoj, që erdhët kaq shumë”.

Faleminderit për ekulibrin ndërmjet të krishterëve e myslimanëve

Papa e falënderoi nga zemra “bashkësinë libaneze për gjithë çka bën në dobi të Libanit”. Për të mbajtur ekulibrin kryesisht - këtë ekuilibër krijues, të fortë, si kedrat - ndërmjet të krishterëve e myslimanëve, sunitëve e shiitëve; “ekuilibër patriotësh, vëllezërish”. E pastaj, për bujarinë tuaj, për zemrën tuaj mikpritëse për refugjatët; kemi më se një milion! Shumë faleminderit - shtoi.

Së fundi, Papa i bekoi të gjithë të pranishmit, familjet, atdheun, bijtë e, natyrisht, edhe refugjatët e tyre.

20 nëntor 2018, 14:52