Papa: fetë të ecin në udhët e paqes, për të mos iu kundërvënë vetvetes
R. SH. - Vatikan
“Fetë, nëse nuk ndjekin udhën e paqes, i kundërvihen vetvetes”. Këtë kujton Papa, në thirrjen drejtuar asamblesë së përurimit të “Urave e paqes”. Të pranishëm, përfaqësues të shumtë fetarë, ndërmjet të cilëve, imami i madh i Al- Azhar, Ahmad al-Tayyeb; Ignatius Aphrem II, Patrik siro-ortodoks i Antiokisë dhe i gjithë Lindjes e personalitete të tjera.
Lutje për dhuratën e paqes
Takimet e organizuara nga Bashkësia e Shën Egjidit - shkruan Françesku - edhe kur skenaret e historisë ndryshojnë shpesh e dramatikisht - mbeten si fill i kuq që, në rrjedhë vitesh, dëshmon sa e nevojshme është të lutemi së bashku, pa u lodhur kurrë, për dhuratën e paqes.
Të shërohen përsëri plagët e historisë
“Duhet t’i ruajmë kujtimet e bashkimit, që i shërojnë plagët e historisë” - kujton Papa në mesazh - sepse është urgjente të punojmë për bashkëjetesën paqësore, sot e në të ardhmen. Roli i feve është “të ndërtojnë ura” në emër të Zotit, e shqetësimi i Françeskut, që forcat e ndryshme të mos i kundërvihen njëra-tjetrës e “zemra e njeriut, i cili beson me të vërtetë, të nxitet për të hapur gjithnjë e kudo, rrugë bashkimi.
Asizi 2016
Në mesazh kujtohet takimi, ku mori pjesë edhe Françesku, organizuar nga Shën Egjidi më 2016, në Asizi, me rastin e 30-vjetorit të ditës, kur Gjon Pali II u bëri thirrje feve të mblidhen në lutje për paqen. Takim, gjatë të cilit u ftuan besimtarët të ndërtojnë një botë me paqe, të jenë artizanë të paqes, t’u përgjigjen shpresave të breznive të reja për të jetuar në një botë me paqe. Një pikë kjo, tek e cila Françesku rikthehet edhe në këtë rast. Duke kujtuar se në Vatikan mbahet Sinodi kushtuar të rinjve, Papa kërkon t’i nxisë të rriten në shkollën e paqes e të bëhen ndërtues dhe edukatorë të saj. “Bota, në të cilën banojnë - shkruan - e dhunshme me të ligshtin, shpesh duket armike e së ardhmes së tyre; shumë nuk e kanë parë kurrë paqen e nuk e dinë akoma ç’do të thotë jetë dinjitoze”.
Të ndërtohen ura, për të ndërtuar paqen
Besimtarët duhet ta “dëgjojnë mirë britmën për paqe, që lartohet nga zemrat e tyre”, e “të ndërtojnë së bashku atë ardhmëri, që u përket”. Prej këndej, nevoja për “të krijuar ura ndërmjet breznive”. E rruga, që duhet ndjekur e që e tregon Papa, është kjo, në të cilën po ecet me këto takime, organizuar nga Bashkësia e Shën Egjidit: “kjo e takimit të burrave e grave të feve dhe breznive të ndryshme, për të treguar se “me ndihmën e Zotit, së bashku mund të ndërtohet paqja”.