Versioni Beta

Cerca

Vatican News
Papa në takimin me të varfërit në Talin të Estonisë Papa në takimin me të varfërit në Talin të Estonisë  (AFP or licensors)

Papa me të varfërit, në Estoni: feja shkon në rrugë, si motrat e Nënë Terezës

Në katedralen e Talinit, Papa Françesku takohet me njëqind vetë, të ndihmuar nga veprat bamirësie të Kishës, me motrat e Nënë Terezës dhe me personelin e Karitasit.

R.SH. - Vatikan

“Feja misionare shkon si këto motra në rrugët e qyteteve tona, të lagjeve tona, të bashkësive tona, duke thënë me gjeste shumë konkrete: je pjesë e familjes, e familjes së madhe të Zotit, në të cilën të gjithë e kemi një vend. Mos rri jashtë”.

Motrat e Nënë Terezës, engjëj të bamirësisë

         Motrat e Nënë Terezës janë ato për të cilat flet Papa, në takimin me të varfërit, që ndihmohen nga Kisha, në Estoni. Gjatë vizitës në katedralen e Shën Pjetrit e të Shën Palit, në Talin, Ati i Shenjtë takon një çift me nëntë fëmijë, ndihmuar nga motrat e persona të tjerë, ndihmuar nga organizata të tjera bamirëse kishtare. “Ku ka fëmijë e të rinj, ka shumë sakrifica, por sidomos ka të ardhme, gëzim e shpresë”, i drejtohet Papa çiftit, duke i ftuar të gjithë të dalin nëpër lagjet e qytetit, për t’u thënë të gjithëve se janë pjesë e bashkësisë, për t’u dhënë atyre një mundësi të re jete.

Marina: më ndihmuan motrat e Nënë Terezës

         Më të vegjlit i ofrojnë lule Papës, ndërsa nëna e nëntë fëmijëve, Marina, tejet e emocionuar, ofron dëshminë e saj. 13 vjet më parë – periudha më e errët – kishte pesë fëmijë e burrin në burg për tre vjet. Një ditë, fëmijët kthehen në shtëpi, të shoqëruara nga dy murgesha veshur me sarin bardh e blu. Motrat sjellin ushqime, veshje e libra, e kthehen edhe herë të tjera. “Janë engjëjt e Zotit”, dëshmon Marina, mirënjohëse. Tashmë, jeton me burrin. Problemet nuk kanë përfunduar, por jeta është më e qetë.

Vladimir: falë motrave të Nënë Terezës pashë dritë në jetë

         Pas saj, Vladimiri, dikur, alkoolist. Mbërrin në shtëpinë e murgeshave të themeluara nga shenjtja shqiptare e bamirësisë e motrat e Nënë Terezës e mësuan të shohë dritën e Zotit në jetën e vet.

         Motrat, nënvizon Papa, janë shembulli i fesë, që nuk “ka frikë ta lerë rehatin, të impenjohet e të dalë me guxim”, për hir të dashurisë së Krishtit, e cila “i thyen zinxhirët, që na izolojnë e na ndajnë, duke ndërtuar ura”.

25 shtator 2018, 14:18