Papa për ANMIL: njeriu nuk është mall, duhet kulturë e re e punë
R.SH. - Vatikan
Papa Françesku priti sot në Sallën Klementine, në Vatikan, anëtarët e Shoqatës italiane të Punëtorëve të Gjymtuar dhe të Invalidëve të Punës, ANMIL, duke u drejtuar fjalë, që vlejnë për botën e punës në gjithë planetin.
Sa vetë, në punë, janë lënduar me pasoja të përhershme e ligështuese, jetojnë me vuajtje të veçanta, sidomos kur gjymtimi u pengon ta vijojnë punën e të sigurojnë jetën për vete e për familjarët e tyre, siç bënin më parë. Të gjithë këtyre u shpreh afërsinë time. Zoti e ngushëllon atë që vuan, pasi Ai vetë ka vuajtur, dhe bëhet i afërt me çdo gjendje ligështie e vështirësie.
Të mos ndërpritet solidariteti
Duke u bërë thirrje qeverive të mos i prekin ligjet e normat, që shprehin solidaritetin e shoqërisë për invalidët e punës, pavarësisht se shpesh mungojnë burimet financiare, Ati i Shenjtë i nxit të ndërhyjnë vetëm aty ku është e nevojshme, duke ua prerë rrugën shpenzimeve të tepërta, siç kërkojnë rregullat e subsidiaritetit.
Doktrina shoqërore e Kishës, nga e cila ju nxis të frymëzoheni gjithmonë, e përmend vazhdimisht këtë ekuilibër ndërmjet solidaritetit dhe subsidiaritetit. Ai duhet kërkuar e ndërtuar në çdo rrethanë e në çdo fushë shoqërore, në mënyrë që, nga njëra anë, të mos mungojë kurrë solidariteti e, nga ana tjetër, të mos kufizohemi vetëm në të, duke e bërë pasiv personin, që akoma mund të japë një kontribut të rëndësishëm në botën e punës. Ai duhet integruar aktivisht, duke shfrytëzuar aftësitë aktuale.
Njeriu nuk është mall
Ky mësim i Kishës, vijon Papa, na ndihmon edhe të mos e ngatërrojmë punën me prodhimtarinë. Ҫdo njeri ka të drejtë të punojë, pavarësisht sa prodhon. Kështu, u jepet dinjitet punëtorëve dhe mbrohen të drejtat e më të ligshtëve, si ato të grave, të invalidëve, të të moshuarve, të emigrantëve.
Stili i subsidiaritetit, që e përmenda tani, e ndihmon krejt bashkësinë civile të kapërcejë barazpeshimin e gabuar e të dëmshëm ndërmjet punës e prodhimtarisë, që e mat vlerën e njeriut mbi bazën e sasisë së mallrave apo të pasurisë që prodhon, duke e reduktuar në ingranazh të një sistemi e, duke i shpërfytyruar veçoritë dhe pasuritë e tij personale. Ky vështrim i sëmurë përmban në vetvete farën e shfrytëzimit e të skllavërimit dhe rrënjoset në një konceptim utilitarist të njeriut.
Më shumë ligje e vetëdije shoqërore
Bota, nënvizon Papa, ka nevojë për një hov të ri humaniteti, duhet të hapë sytë e të shohë se ka përpara njeriun e jo mallin për treg. Këtu, denoncon Ati i Shenjtë, është në lojë vetë thelbi i demokracisë, që bazohet mbi respektin e mbi kujdesin për jetën e secilit. Prandaj, nevojitet një kuadër i përshtatshëm legjislativ, që t’u përgjigjet kërkesave të punëtorëve, por të krijojë edhe një vetëdije të re shoqërore, pa të cilën, ligjet do të mbeteshin në kartë, përfundon Papa Françesku.