Papa i shkruan teologut Walford: "Amoris Laetitia" duhet lexuar e plotë

R.SH. - Vatikan

Shkruan “çfarë i thotë zemra” Papa Françesku, në letrën dërguar autorit të një libri kushtuar Nxitjes Apostolike pas-sinodale “Amoris Laetitia”, që do të dalë së shpejti në librari. Pavarësisht se bëhet e ditur sot, letra i është dërguar Stephen Walford që më 1 gusht 2017 si falenderim për vëllimin e tij me titull: “Papa Françesku, familja dhe divorci. Në mbrojtje të së vërtetës dhe të mëshirës”.

Letra publikohet në “Civiltà Cattolica”

         Reflektimi i Papës Françesku në përgjigje të pyetjeve të autorit, të cilat Ati i Shenjtë i lë mënjanë për t'u shprehur lirisht, është parathënia e librit, që publikohet paraprakisht dhe ekskluzivisht, nga revista e jezuitëve italianë “La Civiltà Cattolica” (Qytetërimi Katolik). “Për t’u vënë në dukje – shkruhet në revistë – fakti që Papa i shkruan babait të familjes, duke konfirmuar se problemet aktuale e konkrete të saj janë trajtuar në Nxitjen Apostolike me një ‘hermeneutikë, që rrjedh nga krejt dokumenti e që është hermeneutika magjisteriale e Kishës, gjithnjë në vazhdimësi (e pa ndërprerje), por edhe gjithnjë në maturim e sipër”. E problemet i përmend vetë Papa: familja në botën e sotme, edukimi i fëmijëve, përgatitja për martesë, familjet në vështirësi e kështu me radhë, për etikën e të cilave “Amoris Laetitia” ndjek doktrinën e Shën Tomës së Akuinit.

Papa dhe Sinodet për familjen

         Ati i Shenjtë e falënderon Stephen Walford edhe për një libër tjetër të tij mbi shoqërinë e shenjtërve, të cilin pati filluar ta lexojë në kohën e shkrimit të letrës. Pastaj, përshkruan udhën e reflektimit të dy Sinodeve për familjen, që solli hartimin e “Amoris Laetitia”. “E gjithë Kisha – shkruan Papa – u lut, reflektoi e, me thjeshtësi, ofroi kontribute të ndryshme”. “Një nga gjërat, që më bëri më shumë përshtypje në këtë proces – vëren Ati i Shenjtë – është dëshira për të kërkuar vullnetin e Zotit, që t’i shërbehet më mirë Kishës… Kjo ndodhi përmes reflektimit, shkëmbimit të opinioneve, lutjes dhe shoshitjes. Natyrisht, pati edhe tundime përgjatë kësaj rruge, por mbizotëroi Shpirti i mirë”.

“Amoris Laetitia” duhet lexuar e plotë

         Papa Françesku thekson se për të kuptuar mesazhin e Nxitjes Apostolike “Amoris Laetitia”, ajo duhet lexuar e plotë, nga fillimi në fund. Kjo, sepse, duke e shfletuar, vërehet zhvillimi i reflektimit teologjik dhe i mënyrës së përballimit të problemeve. “Nuk mund të konsiderohet një ‘vademecum’ mbi argumentet e ndryshme të trajtuara - shkruan Papa. Nëse Nxitja Apostolike nuk lexohet e plotë, në tërësinë e saj e në rendin e argumenteve sipas të cilave është shkruar, nuk do të kuptohet, ose do të kuptohet shtrembër”.

Kush është Stephen Walford

         Autori i librit “Papa Françesku, familja dhe divorci. Në mbrojtje të së vërtetës dhe të mëshirës”, Stephen Walford, është teolog e jeton në Southampton të Anglisë, së bashku me të shoqen Paula dhe me pesë fëmijët. I laureuar në Universitetin e Bristolit, është autor edhe i dy librave të tjerë: “Lajmëtarët e Ardhjes së dytë: Zoja e Bekuar, Mëshira Hyjnore dhe papët e epokës mariane, nga i Lumi Piu IX deri tek Benedikti XVI” (Angelico Press); si edhe “Bashkimi i Shenjtorëve: Uniteti i Dashurisë Hyjnore në Korpin mistik të Krishtit” (Angelico Press). Stephen Walford ka shkruar artikuj për publikime të ndryshme me temë kishtare, eskatologjike dhe mariane. Është edhe pianist dhe mësues muzike.