Papa Françesku: “institucionet financiare të favorizojnë një zhvillim më të qëndrueshëm

R. SH. - Vatikan

“Institucionet financiare duhet të luajnë një rol të rëndësishëm në kujdesin dhe mbrojtjen e Planetit, sepse janë pjesëmarrëse si të problemit, ashtu edhe të zgjidhjes së tij. Eshtë e nevojshme zhvendosja e paradigmës financiare në shërbim të promovimit të zhvillimit të gjithanshëm njerëzor”: këtë dëshirë shprehu Papa Françesku, në takimin e sotëm, me pjesëmarrësit në Konferencën ndërkombëtare “Saving our Common Home and the Future of Life on Earth”, në trevjetorin e Enciklikës “Lëvduar qofsh”.

Duke kujtuar posaçërisht Fondin Monetar Ndërkombëtar dhe Bankën Botërore, Papa këshilloi të favorizohen reformat, që nxisin zhvillimin gjithëpërfshirës dhe të qendrueshëm. Shpresa - pohoi -  është që financa të  jetë mjet, i cili synon prodhimin më të mirë të pasurisë dhe të zhvillimit, si dhe kujdesin për ambientin. Në këtë “shndërrim zemrash” - kujtoi - fetë, posaçërisht Kishat e krishtera, duhet të luajnë një rol kyç.

Papa ftoi t’i kushtohet vëmendje e veçantë dy grupeve njerëzore, që janë në radhë të parë të sfidës së gjithanshme ekologjike e që do të jenë edhe në qendër të vëmendjes të dy Sinodeve të ardhshme të Kishës katolike: të rinjve dhe popullsive indiane vendase, në mënyrë të veçantë, atyre të Amazonës. Të rinjve, sepse duhet të përballojnë pasojat aktuale të krizës ambientale e klimaterike. Bashkësive indiane vendase, sepse shikojnë si u grabiten tokat e u shkelen kulturat nën thundrën e formave të reja të kolonializmit, të ushqyera nga kultura e shpërdorimit  dhe e konsumizmit. Për popullsitë indiane - kujtoi - toka nuk është pasuri ekonomike, por dhuratë e Zotit dhe e të parëve, që pushojnë në paqe në gjirin e saj; është hapësirë e shenjtë, për të cilën kanë nevojë, sepse duke e humbur atë, humbasin edhe identitetin dhe vlerat. Sa shumë mund e duhet të  mësojmë prej tyre!

Papa Françesku kujtoi edhe se kujdesi për krijimin mund të duket ndërmarrje tepër e vështirë, sepse të tepruara janë interesat e veçanta e shumë e lehtë, që interesi ekonomik të ketë epërsi mbi të mirën e përbashkët e të manipulojë informacionin, për t’i ruajtur projektet e veta. Por njerëzit, të aftë për të rënë poshtë e më poshtë, munden  edhe të bëjnë kthesë, të zgjedhin të mirën e të rilindin për një jetë të re. Prej këndej, ftesa e Papës për një ndryshim rrënjësor, me bindjen se padrejtësia nuk është e as e pakapërcyeshme e as e pathyeshme!