Papa Françesku: telegram ngushëllimi për Greqinë e Laosin
R.SH. - Vatikan
Në Greqi, numri i viktimave nga zjarri, që ka përfshirë rajonin e Atikës, e ka kaluar 60-shin; ndërsa në Laos, përmbytje të mëdha e shembja e një dige në jug të vendit, kanë shkaktuar dëme e viktima, deri tani, të pallogaritshme.
Fjalët e Papës për Greqinë
“Thellësisht i trishtuar për zjarrin në Greqi”, Ati i Shenjtë shpreh solidaritetin e tij me të gjithë të prekurit nga kjo tragjedi. “Në veçanti, ai ia rekomandon viktimat dashurisë së mëshirshme të Zotit të Gjithpushtetshëm dhe inkurajon autoritetet civile e personelin e emergjencës në punën e tyre për shpëtimin e njerëzve”.
Fjalët e Atit të Shenjtë për Laosin
E pasi mësoi me trishtim për humbjen e sa e sa jetëve dhe për dëmet e shkaktuara nga përmbytjet serioze në juglindje të Laosit, pas shembjes së një dige, Ati i Shenjtë shpreh solidaritetin e tij në një telegram tjetër, drejtuar autoriteteve kishtare e civile lokale. “Shenjtëria e Tij - thuhet në tekst – lutet veçanërisht që të vdekurit të pushojnë në paqe, të plagosurit të shërohen sa më shpejt dhe ata, të cilët kanë humbur të dashurit e kanë frikë për jetën e personave të tjerë, të gjejnë ngushëllim tek Zoti”. Në të dyja rastet, si për Greqinë, ashtu edhe për Laosin, Papa Françesku u çon të gjithëve bekimin e tij apostolik.