Presidenti francez Macron, më 26 qershor, në audiencë te Papa
R. SH. - Vatikan
Presidenti francez, Emmanuel Macron do të pritet në audiencë nga Papa, më 26 qershorin e ardhshëm, në orën 10.00, në Pallatin Apostolik të Vatikanit. Me rastin e vizitës në Vatikan, presidenti francez Macron do të shkojë në Bazilikën e Shën Gjonit në Lateran, për të marrë në dorëzim titullin e Protokanonikut të nderit të Kapitullit lateranens.
Ceremonia në Shën Gjonin e Lateranit
Macron do të arrijë në Bazilikën e Shën Gjonit në orën 14.30. Për ta pritur, do të dalin kryeipeshkvi mëkëmbës, Angelo De Donatis, dhe të gjithë kanonikët. Kremtimi do të fillojë me një përshëndetje të mëkëmbësit; do të vijojë lutja dhe leximi i një teksti biblik. Më pas kremtuesit do të zhvendosen në Kapelën Kolona, ku Macron do të nënshkruajë dokumentet e marrjes në dorëzim të “fronit” të kanonikut. Me këtë rast kapitulli do t’i bëjë edhe një dhuratë të çmuar: një kopje të kryqit lateranens, që do t’ia dorëzojë imzot Enrico Feroci, kamerleng i kapitullit dhe drejtor i Karitasit dioqezan të Romës.
Më pas do të shkojë në kiostrin e Bazilikës së Shën Gjonit, ku do të sodisë shtatoren prej bronzi të protodiakonit të parë të nderit, Henrikut IV, vendosur në portikun e Sikstit. Së fundi, do të vizitojë katin e fisnikëve të Pallatit Apostolik lateranens, me Sallën e Pajtimit dhe Sallën e Perandorëve.
Enrico IV, Protokanoniku i parë i nderit, traditë e lashtë që lidh Francën me Bazilikën e Shën Gjonit
Nisi në Mesjetë kjo traditë, që e lidh Bazilikën e Shën Gjonit në Lateran, katedrale e Romës, me Francën dhe mbretërit e saj. Rreth vitit 1300 u krijua lidhja me kapitullin lateranens. Ishte pikërisht koha kur nisi ndërtimi i Tabernakullit të Bazilikës, paguar nga Mbreti Karli V (1338-1380): stema e monarkut vijon të duket gjithnjë mbi të: nuk është e rastit, që pikërisht në këtë kohë, Selia Apostolike u zhvendos përkohësisht në Francë, në Avignon të Provansës, ku Papët qëndruan nga vitet 1309 - deri më 1377, në një mërgim, që mbeti në histori si “e keqja e avinjoneze”. U rikthyen, më pas, në Romë, por lidhja nuk u këput… Histori e gjatë kjo… që vijoi në shekuj, deri te Charles De Gaulle, Valery Giscard d’Estaing, Jacques Chirac e, në kohët më të vona, Nicolas Sarkozy, i cili e mori titullin më 20 dhjetor 2007.
