Dita Botërore e të Varfërve në dioqezën e Sapës
R.SH. – Vatikan
Dita Botërore e të Varfërve u kremtua edhe në dioqezën e Sapës, në Shqipëri. Tashmë, është bërë traditë mesha e kremtuar nga ipeshkvi, imzot Simon Kulli e ndjekur nga dreka me të varfrit, organizuar nga Karitasi vendas. “Të jemi bamirës, që e hapin zemrën dhe tregojnë afërsi me njerëzit në nevojë. Të jemi prani e gjallë për ata, që kanë më shumë nevojë”. Të ndjekim informacionin e Violeta Marashit nga Vau i Dejës…
MOS I HIQNI SYTË NGA TË VARFËRIT
Në kuadër të Ditës Botërore të të varfërve, themeluar nga Ati i Shenjtë, Papa Françesku, edhe Caritas Dioqezan Sapa, organizoi drekën me familjet në nevojë, ku tashmë është bërë traditë organizimi i këtij evenimenti, që kur papa e themeloi prej 7 vitesh.
Si gjithmonë kësaj dite i parapriu kremtimi i Meshës Shenjte nga ipeshkvi i Sapës, Imzot Simon Kulli, në Katedralen e Shën Terezes së Kalkutës, në Vau Dejës, ku gjatë predikimit të tij, vuri theksin mbi mesazhin e Papës, me titull “Mos i hiqni sytë nga të varfërit”. Të jemi njerëz bamirës që e hapim zemrën dhe e tregojmë afërsinë me njerëzit në nevojë. Të jemi prani e gjallë ndaj atyre që kanë më shumë nevojë.
Menjëherë pas kremtimit të meshës, të gjithë u drejtuan drejt Sallës së Caritasit për t’u bashkuar në drekën vëllazërore të ofruar nga Caritasi, ku drejtori z. Nikolin Lekaj dhe stafi i këtij institucioni në bashkëpunim edhe me vullnetarët, kishin përgatitur më së miri këtë drekë duke e shndërruar në një atmosferë festive dhe vëllazërore edhe përmes tingujve të muzikës që dhuroi artisti i mirënjohur Shkodran, Luigj Alia.
Nën modelin e bariut të mirë, Imzot Simoni ishte i pari që shërbeu së bashku me meshtarët e motrat, gjatë drekës, ku pjesëmarrja e këtyre personave ishte prani nga shumë famulli të kësaj dioqeze. Edhe në këtë momend, pas bekimit të bukës, ishte bariu i dioqezës i cili i drejtoi mesazh inkurajimi dhe shprese këtyre familjeve me vështirësi ekonomike, por drejtoi edhe një nxitje më shumë të gjithë atyre që kanë mundësi me ndihmu të varfërit.
