Imzot Simon Kulli për vizitë baritore në famullinë e Shën Kollit, Vau i Dejës
R.SH. – Vatikan
Ipeshkvi i Sapës, imzot Simon Kulli, vijon vizitat e tij baritore në famullitë e dioqezës. Kësaj radhe, ai shkoi në famullinë e Shën Kollit në Vaun e Dejës. Siç njofton Violeta Marashi, tema e kësaj vizite ishte “Të ecim së bashku” e si gjatë meshës, ashtu edhe gjatë takimeve të ndryshme, ipeshkvi e vuri në dukje këtë bashkëpunim me besimtarët, në favor të së mirës së përbashkët. “Është bukur të bashkëpunojmë si famulli me të gjitha hallkat e saj – nënvizoi imzot Simon Kulli - të bashkëpunojmë edhe në bashki, në qendrën shëndetësore dhe në shkollë për të mirën e komunitetit ku jetojmë”. Më hollësisht, të dëgjojmë Violeta Marashin…
VIZITA BARITORE NË VAU DEJËS
Në kuadër të Vizitës Baritore që Ipeshkvi i Sapës po zhvillon që nga janari i këtij viti në dioqezën e tij, gjatë këtyre ditëve të tetorit, ai zhvilloi Vizitën baritore të radhës në famullinë e “Shën Kollit” në Vau Dejës. Nën organizimin e famullitarit dom Kastriot Gjokës dhe Bashkësisë së Motrave Dorote, kjo vizitë baritore që mbart temën “Të ecim së bashku”, startoi me kremtimin e Meshës Shenjte në Katedralen e Nënë Terezes. Në emër të bashkësisë famullitare të Shën Kollit, famullitari i uroj mirëseardhjen Ipeshkvit të Sapës, ku e vlerësoi shumë këtë vizitë e cila ka për qëllim prekjen nga afër të realiteteve të famullisë nga ipeshkvi, njohjen me këto realitete si dhe shtytjen përpara kësaj famullie.
Gjatë kësaj vizite baritore, ipeshkvin e kanë shoqëruar famullitari i kësaj famullie: Dom Kastriot Gjoka, Motër Tina dhe Motër Drande.
Sipas programit të mirëpërgatitur, Ipeshkvi është takuar me fëmijët e katekizmit, sidomos me grupet e kungimit të parë dhe të krezmimit. Është takuar me rininë, katekistat, korin e ministrantat. Po ashtu ka vizituar edhe disa familje të varfëra si dhe persona të moshuar dhe Persona me Aftësi Ndryshe
Ka vizituar dhe komunitetet e Motrave Dorote dhe Motrave të Shtëpisë së Bamirësisë, stafin e karitasit dioqezan dhe vullnetarëve e tij, Legjionin e Marisë të kësaj famullie, si dhe kopshtin e fëmijëve: “Gianluca Felici” në Fang, të cilët të gjithë sipas karizmës së tyre dhe misionit, janë një vlerë e çmuar në jetën e besimtarëve të kësaj famullie.
Për ta plotësuar kuadrin e kësaj vizite baritore, ipeshkvi ka takuar edhe Kryetarin e bashkisë Vau Dejës, me stafin e tij, ka bërë vizitë edhe tek qendra shëndetësore si dhe tek shkolla: “Imzot Lucian Avgustini”.
Në secilin prej këtyre realiteteve që ka vizituar, ipeshkvi ka theksuar “ecjen së bashku”, duke shprehur edhe falenderimin dhe mirënjohjen e tij për bashkëpunimin e secilit që punon dhe shërben në të mirën e përbashkët. Bashkë jemi më të sigurtë, më të fortë dhe më të motivuar për të ecur përpara në realizimin e projekteve të jetës tonë – ka thënë Imzot Simoni. Është bukur të bashkëpunojmë së bashku si famulli me të gjitha hallkat që i ka famullia; të bashkëpunojmë së bashku edhe në bashki, në qendër shëndetësore dhe në shkollë për të mirën e komunitetit ku jetojmë. Si strukturat shtetërore për të mirën e përgjithshme ashtu edhe strukturat fetare për të mirën shpirtërore janë një gërshëtim më së miri në shërbim të këtij komuniteti. Gjithashtu, ipeshkvi tregoi gatishnërinë e tij për çdo nevojë në mbarëvajtjen e famullisë.
Një falenderim i përzemërt i është dhënë atij me meshën përmbyllëse të kësaj vizite baritore, ku gjatë këtij kremtimi i është dhuruar edhe një kazul, si shprehje gëzimi dhe mirënjohjeje e pranisë së Imzot Simon Kullit gjatë këtyre ditëve në famullinë e Shën Kollit.
