Një pishinë për fëmijët e Jeruzalemit
R. SH. - Vatikan
Kur bëhet fjalë për pishinat në Jeruzalem, na vjen menjëherë ndërmend pishina Probatike ose ajo e Siloes, transmetuar nga Shkrimet e Shenjta. Por sot nuk e kemi ndër mend të flasim për to! Në mënyrë të jashtëzakonshme, një objekt i ri noti funksionon brenda mureve të Sulejmanit, në qytetin e vjetër, duke na kujtuar lashtësinë e këtij vendi historik, gjithnjë të pasur me ujëra e me pishina!
Mëngjesin e 3 korrikut, me një kremtim të shkurtër, por të shumëndjekur, u përurua një pishinë e re. E bekoi, atë Francesco Patton, Rojtar i Tokës Shenjte, në hapësirat e shkollës me emrin “Holy Land High Schol.
Të duket e pabesueshme që brenda qytetit të vjetër, në kompleksin e Rojtarisë të Tokës së Shenjtë, u bë i mundur ndërtimi i kësaj pishine, punë komplekse inxhinierike, që kërkoi gati tri vjet rropatje.
“Natyrisht që nuk ishte punë e lehtë të gërmosh nëpër rrënojat e një qyteti, me tri mijë vjet histori” - shpjegon At Ibrahim Faltas, vikar, kujdestar dhe drejtor i shkollave katolike të Tokës së Shenjtë, krijues e ndërtues i Pishinës. "Gjetëm - kujton - edhe mbetjet e mureve të një kishe bizantine që, tani të restauruara si duhet, do të jenë të dukshme nëpër një pllakë mbrojtëse prej qelqi".
Krahas shërbimit në shkollë - vazhdon At Faltas - “synojmë të hapim edhe ambientin sportiv në territor, natyrisht gjithnjë brenda mundësive! Misioni ynë, si Rojtarì e Tokës Shenjte, është kryesisht të jemi pranë njerëzve, që jetojnë këtu. Nuk jemi kujdestarë muzeu, por Ungjill i gjallë për shumëkënd, veçanërisht për fëmijët, që jetojnë dhe vuajnë në këtë qytet”.
