Ndjesa e plotë, për ditën e të moshuarve
R. SH. - Vatikan
Ndjesë e plotë për gjyshërit, të moshuarit dhe të gjithë besimtarët, të cilët të nxitur nga " shpirti i pendimit dhe i bamirësisë", do të marrin pjesë më 23 korrik, me rastin e Ditës III Botërore të Gjyshërve dhe të Moshuarve, në Meshën që Papa Françesku do të kryesojë në orën 10.00, në Bazilikën e Shën Pjetrit, ose në kremtimet e ndryshme në mbarë botën. E lexojmë lajmin në një dekret, paraqitur nga kardinali Kevin Joseph Farrell, prefekt i Dikasterit për Laikët, Familjen dhe Jetën, i cili kujton edhe kushtet e zakonshme për marrjen e ndjesës: janë rrëfimi sakramendor, kungimi dhe lutja sipas ndjeteve të Papës.
Ndjesë e plotë edhe për ata që vizitojnë të moshuarit dhe të sëmurët
U jepet ndjesa e plotë, d.m.th, "falja para Zotit e dënimit të përkohshëm për mëkatet dhe shlyerja e tyre", siç përcaktohet nga Katekizmi i Kishës Katolike, edhe besimtarëve të cilët, në Ditën Botërore të Gjyshërve dhe të të Moshuarve, sivjet me temën “Brez pas brezi shtrihet mëshira e Tij” - vazhdon Dekreti - “do t’i kushtojnë kohën e duhur e do t’i vizitojnë personalisht ose virtualisht, nëpërmjet mjeteve të komunikimit”, të moshuarit nevojtarë, apo njerëzit, që kalojnë çaste të vështira, si p.sh. të sëmurët, të braktisurit, të paaftët. E do të mund ta fitojnë edhe ata që, “duke ndenjur larg mëkatit e duke përmbushur sa më parë të tre kushtet e zakonshme” - kujton Pendestaria Apostolike - “domethënë të moshuarit, të sëmurët dhe të gjithë ata që, duke mos mundur të largohen nga shtëpitë e tyre për arsye të rënda, do të bashkohen shpirtërisht me funksionet e shenjta të Ditës Botërore, duke ia mblatuar Zotit të Mëshirshëm lutjet, dhimbjet dhe vuajtjet e jetës”.
Për t'u krijuar besimtarëve mundësinë "e fitimit të hirit hyjnor", Pendestaria Apostolike u kërkon meshtarëve "të jenë të gatshëm dhe bujarë për kremtimin e Sakramentit të Pajtimit - Rrëfimin”.
