Të meditojmë me Ungjillin e festës së të Shëlbuemit

R.SH. - Vatikan

Në Ungjillin e kësaj së diele, kur Kisha Katolike kremton festën e të Shëlbuemit, Ngjitjen e Jezu Krishtit në qiell, Biri i Zotit, i Ringjalluri, u flet dishepujve të mbledhur në malin e Galilesë, që simbolizon takimin ndërmjet qiellit e tokës, duke deklaruar solemnisht se ai ka autoritet në qiell e në tokë. Prej andej, i nis ata dhe ne – dishepujt e Tij të sotëm – për t’i pagëzuar gjithë popujt në emër të Atit e të Birit e të Shpirtit Shenjt. Na premton se do ta kemi gjithnjë pranë, prandaj, asgjë nuk duhet të na frikësojë. Të ndjekim pjesën ungjillore, marrë nga kreu 28 i shën Mateut (16-20)…

Në atë kohë të njëmbëdhjetë nxënësit shkuan në Galile, në atë mal, ku u kishte urdhëruar Jezusi. Kur e panë, e adhuruan, por disa dyshuan. Jezusi u afrua e u tha: “Më është dhënë çdo pushtet në qiell e në tokë. Prandaj, shkoni e bëjini nxënës të mi të gjithë popujt! Pagëzoni në Emër të Atit e të Birit e të Shpirtit Shenjt! Mësojini të zbatojnë gjithçka ju kam urdhëruar! Dhe, ja, unë jam me ju gjithmonë ‑ deri në të sosur të botës!”.

Të lutemi së bashku

Shkoni, na thua Ti, o Zot Jezus

shkoni në gjithë botën,

mos e mbani për vete

këtë kumt gëzimi,

këtë mesazh shprese,

që ua ndryshon jetën njerëzve.

Çka dëgjuat,

çka patë,

transmetojuani gjithë popujve.

Të gjithë duhet ta njohin

fytyrën e vërtetë të Zotit,

të gjithë duhet t’i përgjigjen

dashurisë së Tij pa fund,

të gjithë duhet të kenë mundësi

të arrijnë lumturinë, që Ai ua përgatit.

Shkoni, na thua Ti, o Zot Jezus,

fjalët e shëlbimit

që ju kam besuar

të bëhen dritë, që shndrit

çdo plagë të jetës,

të bëhen burim urtie

për çastet e errta e plot dyshime,

të bëhen busull në mes të stuhive dhe uraganeve.

Shkoni, na thua Ti, o Zot Jezus,

e pagëzoni në emër të Hyjit,

i cili është Atë e Bir e Shpirt i Shenjtë:

që çdo njeri të shndërrohet në birin e Zotit,

përtërirë nga vdekja e ringjallja e Tij,

shtyrë me dashuri drejt një jete të re.

Shkoni, na thua Ti, o Zot Jezus,

e mos kini frikë se Unë jam me ju e ju shoqëroj,

ndoshta, pa u vënë re,

por besnikërisht,

nëpër udhët e historisë.