Të meditojmë me Ungjillin: Shpirti Shenjt do t’ju mësojë gjithçka

R.SH. - Vatikan

Në atë kohë, Jezusi u tha dishepujve: “Nëse më doni, do t’i mbani urdhërimet e mia. Edhe unë do t’i lutem Atit dhe Ai do t’ju japë një Mbrojtës tjetër, që të jetë me ju përgjithmonë.

Nëse ndokush më do, ai do të ma mbajë fjalën, Ati im do ta dojë, tek ai do të vijmë dhe tek ai do të banojmë. Kush nuk më do, nuk i mban fjalët e mia. E fjala që po dëgjoni, nuk është imja, por është e Atij, që më dërgoi, - e Atit. Këto fjalë jua thashë ndërsa banova me ju. E Shpirti Shenjt - Mbrojtës, të cilin do t’jua dërgojë Ati në Emër tim, Ai do t’jua mësojë të gjitha dhe do t’ju përkujtojë gjithçka [unë] ju thashë.

Të lutemi së bashku

Pa Shpirtin Shenjt, o Jezus,

asgjë s’mund të rritet e të plotësohet.

Shkrimi Shenjt mbetet

i mbyllur e i pashqyrtueshëm,

historia duket pa kuptim

e pa drejtim,

Lajmi i Mirë ka rrezik të jetë

fjalë e pafrytshme,

sprovat – pengesë

e pamundur për t’u kapërcyer

e bota e re, veç një kimerë,

një ëndërr, një iluzion

paketuar enkas për të brishtët e kësaj toke.

Vetëm Shpirti Shenjt, o Jezus,

mund ta shndrisë udhën tonë,

të na bëjë të shohim kuptimin më të thellë

të ngjarjeve, që na ndodhin.

Vetëm Shpirti Shenjt mund të depërtojë

tymnajën e dendur, që na pengon

ta shohim horizontin e të na ngjallë shpresën

për t’i parë ato qiej të rinj e atë tokë të re

që Ti na i ke premtuar në mirësinë Tënde pa fund.

Vetëm Shpirti Shenjt, o Jezus,

mund të na e heqë nga zemra

trishtimin, që na paralizon,

shkurajimin, që na bllokon

e të na japë guximin dhe besimin

e nevojshëm për të arritur

horizontin e shtegtimit tonë,

plotësinë e një jete të amshuar.