Të meditojmë me Ungjillin: ndërsa i bekonte, u ngjit në qiell
R.SH. - Vatikan
Në Kishat e mbarë botës kremtohet më 29 maj e Diela e të Shëlbuemit, ose Ngjitja e Krishtit në Qiell, e cila, në Vatikan, u kremtua të enjten. Siç dihet, festat zhvendosen të dielën më të afërt, për t’u lejuar pjesëmarrjen gjithë besimtarëve. Në Ungjillin e kësaj së diele, marrë nga kreu 24 i Shën Lukës (46-53), Jezusi ndahet nga dishepujt, duke i bekuar e duke ua besuar Atit qiellor e Shpirtit Shenjt, në mënyrë që ata të bëhen dëshmitarë të guximshëm të Tij. Në të gjitha kohrat, Shpirti Shenjt i ndihmon besimtarët të bëhen misionarë, në gjendje t’i tregojnë botës ku e ka burimin forca e fesë së tyre. Të ndjekim pjesën ungjillore…
Në atë kohë, Jezusi u tha nxënësve të vet: “Kështu është në Shkrim shenjt: ‘Mesisë i duhet të pësojë e të ngjallet së vdekuri të tretën ditë’. Në Emër të tij do të predikohet ndër të gjithë popujt, duke filluar prej Jerusalemit, kthimi dhe falja e mëkateve. Ju jeni dëshmitarët e kësaj gjëje. Dhe, ja unë do ta dërgoj mbi ju Premtimin e Atit tim. Qëndroni, prandaj, në qytet deri që të vesheni me Fuqinë prej së larti.” Atëherë i mori me vete deri në Betani, i çoi duart dhe i bekoi. E, ndërsa po i bekonte, u nda prej tyre dhe u ngjit në qiell. Ata ranë përmbys para tij dhe e adhuruan e me gëzim të madh u kthyen në Jerusalem dhe vazhdimisht ishin në Tempull duke i dhënë lavdi Hyjit.
Të lutemi së bashku
Ti nuk i braktis dishepujt
në fatin e tyre, o Jezus,
nuk i lë vetëm t’u bëjnë ballë
rreziqeve dhe lodhjes
nga misioni, që u ke besuar.
Madje, duke u ngjitur në qiell Ti mund të jesh afër
secilit prej tyre, secilit prej nesh.
Natyrisht, prania jote, o Zot i ringjallur,
nuk i imponohet askujt,
por ata, që të kërkojnë,
ata, që të mirëpresin,
ata, që dëshirojnë
të vënë në jetë Fjalën tënde,
mund të mbështeten tek Ti
në çdo çast të jetës,
në çdo fragment të historisë.
Tani, çdo burrë e çdo grua,
nga çdo komb e çdo epokë,
mund të të takojnë të Gjallë në udhën e tyre.
Sepse Ti vjen drejt nesh
me Fjalën tënde,
ruajtur në Ungjij,
Fjalë që na i shndrit e na i gjallëron zemrat.
Sepse Ti vazhdon ta dhurosh vetveten
si një Atë i mirë,
që dhuron jetën e pasosur.
Sepse Ti vjen për vizitë
përmes vëllezërve tanë,
sidomos përmes atyre,
që na kërkojnë ndihmë.