Shenjtorët e javës 1 - 8 gusht
R.SH. - Vatikan
E diel 1 gusht, Kisha katolike kremton të Dielën e XVIII të vitit liturgjik 'B', po më 1 gusht kalendari përkujton shën Alfonsin Maria de Liguorin, ipeshkëv e doktor i Kishës, themelues i Kongregatës së Shëlbuesit të Shenjtë. Gjithashtu përkujtohen shtatë vëllezërit Makabej dhe i Lumi Pietro Favre, meshtar jezuit.
Ungjilli i kёsaj sё diele nga Gjoni (Gjn 6,24-35) na tregon se turma, pas shumëzimit të bukëve e peshqve, e kërkon Jezusin dhe e gjen në Kafarnaum. Edhe ne duhet ta kërkojmë, ta takojmë e ta mirëpresim në zemrat tona Jezusin, “bukën e jetës”, që i jep kuptim e shpresë udhës, shpesh tejet të përpjetë, të ditëve tona. Jezusi, nё Ungjillin e kёsaj sё diele nga Gjoni , na fton të mos mbyllemi në horizonte thjesht njerëzore, por të shikojmë shumë më larg, ta hapim zemrën për të parë horizontet e pafundme të Zotit, horizontet e fesë.
Të hënën më 2 gusht, kalendari kishtar përkujton shën Euzebin nga Verçeli, ipeshkëv dhe shën Pier Xhulian Ejmard, themelues i Sakramentinëve. Liturgjia e ditës na kujton na kujton se buka që Jezusi shumëfishon për të ushqyer turmën, e cila e dëgjon me fe është simbol i asaj që Krishti do t’u japë besimtarëve në Kishën e vet.
Të martën më 3 gusht, kujtohen shën Lidia, dishepulle e Shën Palit, shën Asprenati e shën Eufroni. Liturgjia e ditës na kujton se deti, në Bibël, konsiderohet si një fuqi e tmerrshme dhe është simbol i forcave që kërcënojnë botën. Jezusi, jo vetëm e dominon atë, por bën që edhe të tjerët të marrin pjesë në këtë dominim, kur kanë besim në Të.
Të mërkurën më 4 gusht, bie përkujtim i famullitarit të shenjtë të Arsit, shën Gjon Maria Vianejt, pajtor qiellor i klerit. Liturgjia e ditës na mëson se Zoti na ruan, siç bën bariu me grigjën e vet. Jezusi i respekton etapat e misionit të marrë nga Ati: shpall mbretërinë e Hyjit dhe u jep mision dishepujve tua shpallin atë paganëve. Por kur feja hap zemrën e zgjon lutjen e përvuajtur, të gjitha etapat mund të digjen.
Të enjten më 5 gusht, bie përkujtimi i shën Emidit, shën Osvaldit dhe e kushtimit të Bazilikës romake të Zojës së Madhe. Liturgjia e ditës na kujton se Jezusi është Mesia, që Zoti e ka dërguar në popullin e vet, është shërbëtori i Hyjit që shkon drejt vdekjes për të plotësuar misionin e tij të shëlbimit.
Te premten me 6 gusht, bie festa e Shndërrimit të Zotit tonë Jezu Krisht. Ungjilli i ditës na tregon se i rrethuar nga Moisiu e Elia, Jezusi duket si mbret-mesi, profet-shërbëtor, biri i njeriut. Me zërin e vet, Hyji njeh Birin (Jezusin) para apostujve, duke i përgatitur kështu të kapërcejnë me fe shkandullin e Mundimeve tё Tij në Kryq.
Të shtunën më 7 gusht, kalendari kishtar përkujton shën Sikstin II, papë me shokë, të gjithë martirë, shën Donatin e shën Gaetanin nga Tiene, themelues i Teatinëve. Liturgjia e ditës na kujton se në një botë të kërcënuar nga pushteti i së keqes, njeriu është skllav i gjërave. Por e keqja as që do ta prekte, nëse ai do të besonte vërtet në Atë, që është Zoti i së pamundurës. Këtë na kujtojnë shenjtorët e kësaj dite.
Të dielën e ardhshme me 8 gusht, Kisha katolike do tё kremtojё tё Dielën e 19-të gjatë vitit liturgjik, e po më 8 gusht bie edhe festa e shën Dedës të Guzmanit, meshtar, themelues i Urdhrit të Predikatarëve (Domenikanëve).