Hungari: paraqiten video dhe himni zyrtar i Kongresit të 52-të eukaristik
R.SH. - Vatikan
Një vajzë e re, e specializuar në mjekësi, që mbështet pranë zemrës një grua të moshuar, të sëmurë; një muzikant i ri i rock, që mban në qafë një Kryq, pavarësisht nga talljet e bashkëmoshatarëve; një meshtar i ri, që jeton çaste të vështira. Këta janë protagonistët e videos zyrtare, përgatitur për Kongresin e 52-të Eukaristik Ndërkombëtar (Iec), që do të mbahet në Budapest të Hungarisë, nga 5 deri më 12 shtatori i ardhshëm. Historia e të rinjve, që tregohet në videon zyrtare e që mund të ndiqet në You Tube, përfundon me arritjen e tyre në katedralen e Budapestit, kushtuar Shën Shtjefnit, mbreti i parë i vendit që, në vitin njëmijë, e pagëzoi gjithë kombin.
Himni zyrtar, i vjetri e i riu
Videoja zyrtare e Kongresit u paraqit dje, 14 qershor, nga kardinali Péter Erdö, kryeipeshkëv metropolit i Esztergom-Budapest, në një konference shtypi, gjatë së cilës Hirësia e Tij foli edhe për Himnin zyrtar. Himn njëkohësisht “i lashtë dhe i ri”, sepse “variant i përditësuar i këngës origjinale, shkruar për Kongresin Eukaristik të vitit 1938, viti i fundit në të cilin Budapesti mikpriste një ngjarje kaq të madhe. Ky Kongres, në të cilin mori pjesë, si legat papnor, kardinali Pacelli, Papa i ardhshëm Pio XII, u mbajt në një atmosferë tensioni e frike, sepse tashmë në horizont ndjehej fryma e keqe e Luftës II Botërore. Si himn, qe zgjedhur një këngë, e cila bënte thirrje për paqe e unitet ndërmjet popujve e kombeve. Kjo këngë u bë shumë popullore për të gjithë katolikët hungarezë, e jo vetëm, aq sa u intonua edhe gjatë Meshës, kryesuar nga Papa Françesku më 1 qershor 2019, në Shenjtëroren Sumuleu Ciuc, zonë e Rumanisë me zanafillë maxhare.
Dymbëdhjetë “ambasadorë”, dëshmitarë të Eukaristisë
Gjatë konferencës së shtypit, kardinali Erdö paraqiti edhe 12 ambasadorët Iec”, apo muzikantët, këngëtarët dhe poetët e famshëm, që do të jenë “dëshmitarë të Eukaristisë”. Për t’u kujtuar se Iec 2021 do të zhvillohet me temën “Janë në Ty të gjitha burimet e mia” (Ps. 87,7).
Prania e Papës
Në Meshën përfundimtare pritet edhe Papa Françesku i cili, që nga marsi i kaluar, gjatë një konference shtypi në fluturimin e kthimit nga shtegtimi apostolik në Irak, shprehu dëshirën për të marrë pjesë. Në program për vitin 2020, ngjarja e madhe u shty një vit për shkak të pandemisë së Covid-19.
Po kujtojmë vetëm tri strofat e para dhe refrenin e himnit zyrtar të Kongresit të 52-të eukaristik.
Himni i Kongresit Eukaristik
(tri strofat e para)
Një pyetje e lashtë jehon:
“Ç’kuptim kanë lindje e mort?”
Në udhët ku ecim pa fund,
në jetën që s’ka horizont?
Ku të shkoj, o Zot i bekuar?
Veç Ti ke fjal’ jete t’ amshuar!
Erdh një njeri, me ne u bë vëlla
E dorën fort na e shtrëngoi
Ish Zemra që botën e shndriti
E Fjalën e Zotit mishëroi!
Ku të shkoj, o Zot i bekuar?
Veç Ti ke fjal’ jete t’ amshuar!
Ai erdhi e tha me guxim
“S’mjafton veç buka juaj!”.
Më e thellë është uria e shpirtit
Veç Zoti atë mund ta shuaj!”
Ku të shkoj, o Zot i bekuar?
Veç Ti ke fjal’ jete t’ amshuar!