Të meditojmë me Ungjillin e së dielës XIX të vitit liturgjik
R.SH. - Vatikan
22 Mandej aty për aty Jezusi u urdhëroi nxënësve të hyjnë në barkë e të kalojnë para tij në anën tjetër derisa ai ta shpërndajë popullin. 23 Jezusi, si e nisi popullin, u ngjit vetëm në mal për t’u lutur. Ishte bërë natë e ai ende gjendej aty vetëm. 24 Barka, që tashmë ishte shumë stadje larg tokës, përplasej prej valësh, sepse frynte era e kundërt. 25 Në rojën e katërt të natës erdhi Jezusi tek ata duke ecur përmbi det. 26 Kur nxënësit e hetuan duke ecur përmbi det, u frikësuan e thanë: “Diçka po na shtihet!” e prej frikës bërtitën. 27 Por, menjëherë Jezusi u tha: “Zemër, jam unë, mos kini frikë!” 28 Pjetri u përgjigj: “Zotëri, nëse je ti, më urdhëro të vij te ti përmbi ujë!” 29 “Eja!” - i tha. Atëherë Pjetri zbriti nga barka e po ecte nëpër ujë për të shkuar te Jezusi. 30 Porse, kur e pa erën e fortë, u frikësua, filloi të humbasë në ujë dhe bërtiti: “Më shpëto, o Zot!” 31 Jezusi përnjëherë shtriu dorën, e kapi dhe i tha: “Fepakët! Përse dyshove!” 32 Kur hynë në barkë, pushoi era. 33 Ata që ishin në barkë u përkulën me nderim para tij e thanë:
“Me të vërtetë je Biri i Hyjit!”
Të lutemi së bashku:
Na mjafton pak, o Jezus, për t’u gjetur në vështirësi:
era e kundërt, fillimi i ndonjë turbullire,
e ja që entuziazmi ynë
shuhet menjëherë.
Fillojmë të shqetësohemi, e humbim qetësinë,
e guximi na zhduket.
E kur, rastësisht, na përplaset në fytyrë
një uragan i vërtetë,
kur elementet e natyrës pështjellohen
e valët kërcënohen,
atëherë, ndihemi krejtësisht të humbur.
Po, feja jonë është e dobët:
nuk jemi në gjendje të përballojmë konflikte,
të pranojmë vështirësi,
të llogarisim edhe persekutimin.
Sapo duket në horizont ndonjë problem
trishtohemi e ndihemi të izoluar,
Të qahemi se na ke braktisur, o Jezus,
se nuk po kujdesesh për ne.
Dyshojmë për dashurinë tënde, për praninë tënde besnike
krah për krah nesh, çdo çast.
Çdo vuajtje na duket
barrë e padrejtë, barrë tepër e rëndë.
O Jezus, na e forco këtë fenë tonë të lëkundshme,
na çliro nga trishtimi,
mbaje gjallë flakën e shpresës sonë.