Lurdë: Sot nisi shtegtimi kombëtar francez
R. SH. - Vatikan
Ai, që nisi sot e që do të përfundojë më 16 gushtin e ardhshëm, nuk do të jetë shtegtimi klasik vjetor kombëtar francez në Shenjtëoren e Lurdës, që organizohet për të 147-tën herë. Për shkak të pandemisë ngjarja, me titullin profetik “Të shkojmë në burimin e dashurisë” - parashikon pjesëmarrjen e pak shtegtarëve, në krahasim me turmat e pafundme të viteve të shkuara. Besimtarët, e sidomos të sëmurët e të shtruarit në spitale, që nuk mund të marrin pjesë, do t’i përfaqësojë një delegacion, që do të ketë edhe detyrën për t’i ndihmuar njerëzit në vend - njofton konferenca ipeshkvnore.
I pranishëm, Sekretari i Shtetit të Vatikanit
Ndonëse virusi kufizon ndjeshëm numrin e pjesëmarrësve, tradita, përsa u përket ngjarjeve, do të respektohet: programi është i pasur, si gjithmonë, me kremtime, rruzare, procesione, dëshmi, biseda publike, shoqërore e shpirtërore, netë pa gjumë në lutje, lutje në Shpellën e Masabielës e koncerte. Ditën e Solemnitetit të Zojës së Ngjitur në qiell - 15 gusht - kremtimi eukaristik do të kryesohet nga kardinali Pietro Parolin, Sekretar i Shtetit të Vatikanit.
Pritje e posaçme
“Shtegtimi kombëtar francez - kujton atë Nicola Ventriglia, kapelan i Shenjtërores së Lurdës - u organizua nga kongregata e Asuncionistëve. Për shtegtarët, që do të marrin pjesë, u përgatit një mikpritje e ngrohtë, gati speciale: duhet ta ndjejnë veten si në shtëpi të vet. Natyrisht! Shenjtërorja mariane është shtëpia e Marisë, e si shtëpi e Zojës, është edhe shtëpi e ne të gjithëve. Nuk do të mungojnë edhe kremtimet ndërkombëtare sepse - kujton atë Ventraglia - Lurda është shenjtërore botërore. Ndonëse shtegtimi është farncez, parashikohen edhe kremtime në gjuhë të tjera, E pastaj, gjëja më e bukur, do të jetë kushtimi Zemrës së Zojës!
Pishinat, të rihapura
Gjatë shtegtimit do të ketë edhe një shenjë të rëndësishme të rikthimit të ngadalshëm në normalitet: do të hapen pishinat. Ndonëse nuk do të mund të bëhet akoma banjo - saktëson atë Ventriglia. Por të pranishmit mund të sillen rreth e rreth tyre, veprimtari që do të përfundojë me gjestin e ujit: të ndihmuar nga ekipi ynë, shtegtarët do të mund të marrin pakëz ujë, mund ta pinë ose të lahen me të. Si Maria, që e kënaqi pa masë Bernardetën, ashtu edhe ne duam që shtegtarët të ndjehen mirë, shumë mirë.
Prania e kardinalit Parolin
Në orën 10.00 të së shtunës, 15 gusht, kremtimin, në solemnitetin e Të Ngjiturit të Zojës në Qiell, do ta kryesojë Sekretari i Shtetit të Vatikanit, kardinali Pietro Parolin. “Prania e tij - shton atë Ventriglia - është inkurajim i madh për ne, në një çast kaq të vështirë. Kjo prani na bën ta ndjejmë fare pranë edhe të shumëdashurin, Atin tonë të Shenjtë, Françeskun".