Shtegtim, drejt shenjtëroreve mariane.
R. SH.- Vatikan
Pas Tokës Shenjte, caqet më të dëshiruara të shtegtimeve janë shenjtëroret mariane. Atje ku Zoja e Bekuar iu duk njerëzve më të përvuajtur: barinjve! Por, para së të marrim shkopin e shtegtarit e të nisemi për shtegtimet mariane, duhet të dimë për ku po nisemi. E edhe pse! Cilin nga vendet mariane, dëshirojmë të vizitojmë? Sepse janë 15 vetëm ato, që i ka pranuar deri më sot vetë Kisha, ndonëse Zoja vijoi e vijon të duket…
15 dukjet mariane, të njohura nga Kisha
Lajmi i parë, i njohur historikisht, që na kujton një dukje të Marisë, vjen nga Gregori i Nissës (335-392), që flet për vegimin e një ipeshkvi tjetër grek, Gregorit Mrekullibërës, në vitin 231. Po tradita na çon edhe më thellë në kohë. Shenjtërorja e Pilar, në Saragozë të Spanjës, për shembull, thuhet se e pati zanafillën nga dukja e Zojës Shën Jakut Apostull, ungjillëzues i Spanjës, në vitin 40 pas Krishtit. Një nga specialistët më të mëdhenj marianë, abati Rëné Laurentin, në Fjalorin e tij të famshëm të dukjeve të Virgjërës Mari, botuar italisht në vitin 2010, mblodhi më se dy mijë ndërmjetësime të jashtëzakonshme të Zojës, nga zanafilla e krishterimit, deri më sot. Histori e ndërlikuar, në të cilën spikasin 15 dukje, të pranuara zyrtarisht nga Kisha.
Kujtojmë vitet kur u duk e njerëzit fatlumë, të cilëve iu duk: Laus (Francë),1664-1718, Benôite Rencurel; Romë 1842, Alfonso Ratisbonne; La Salette (Francë) 1846, Massimino Giraud e Melania Calvat; Lourdes (Francë) 1858, Bernadette Soubirous; Champion (Usa) 1859, Adele Brise; Pontmain (Francë) 1871, Eugène e Joseph Barbedette, François Richer e Jeanne Lebossé; Gietrzwald (Poloni) 1877, Justine Szafrynska e Barbara Samulowska; Knock (Irlandë) 1879, Margaret Beirne e disa vetëve; Fatima (Portugali) 1917, Lucia Dos Santos, Francesco e Giacinta Marto; Beauraing (Belgjikë) 1932, Fernande, Gilberte e Albert Voisin, Andrée e Gilberte Degeimbre; Banneux (Belgjike) 1933, Mariette Béco; Amsterdam (Holandë) 1945-1959, Ida Peerdemann; Akita (Japoni) 1973-1981, Agnes Sasagawa; Betania (Venezuelë) 1976-1988, Maria Esperanza Medano; Kibeho (Ruandë) 1981-1986, Alphonsine Mumerekë, Nathalie Ukamazimpaka e Marie-Claire Mukangango.
Ç’do të thotë “Njohje zyrtare”
Njohje zyrtare nga ana e Kishës, do të thotë se Kisha është shprehur në favor të dukjes, përmes dekreteve të saj. E pyetjes së natyrshme “pse duket Zoja?”, mund t’i përgjigjemi: “Që të na marrë për dore e për të na çuar te Krishti. E që të na ndihmojë të ecim pas Tij në udhët e ndërlikuara të jetës, deri të caku i mbramë, deri te Porta e amshimit!