Kërko

Vatican News
 Shpella e Lurdës Shpella e Lurdës  (AFP or licensors)

Francë: më 16 maj, rihapja e pjesshme e Shenjtërores së Lurdës

E mbyllur për dy muaj për shkak të pandemisë së coronavirusit, Shenjtërorja e Lurdës do të rihapet nesër, por vetëm për shtegtarët, që vijnë nga zona, me distancë 100km. Të reja, edhe rregullat: vizitat do të mund të bëhen vetëm pasdite, duke respektuar të gjitha normat e Covid-19. Akoma të ndaluara, meshët me popull.

R. SH. - Vatikan

“Një shenjë e madhe shprese”: kështu e quan imzot Oliver Ribadeau Dumas, rektor i Shenjtërores mariane të Lurdës, në Francë, hapjen e pjesshme të vendit të kultit, parashikuar për nesër, 16 maj. E mbyllur për dy muaj, për shkak të pandemisë së coronavirusit, Shenjtërorja do t’i hapë përsëri dyert vetëm për shtegtarët, që vijnë nga rrethinat, me distancë deri në 100 km.

Rregullat e reja, për t’u respektuar

Pas mbylljes më të gjatë në histori, vendi i kultit, që përkujton dukjet e Virgjërës Mari Bernardetës Soubirous, do t’i rihapë portat me nëntë rregulla. Ndërmjet tyre:

“Vizitat do të jenë të mundura vetëm pasdite, nga ora 14.00 deri në 18.00; mund të hyjnë vetëm grupe prej dhjetë shtegtarësh, me maska, për të qëndruar vetëm 30 minuta. Nuk lejohet hyrja në Shpellën e Dukjeve, por mund të qendrohet para saj e mund të merret edhe ujë nga burimi.

Duhet pritur akoma, për të ndjekur Meshë me popull”.

 

15 maj 2020, 14:43