Dita Botërore e Thirrjeve: të thirrur për një “po” të vërtetë
R. SH. - Vatikan
Në mes të pandemisë, në atmosferën e dhimbjes, të humbjeve e të tronditjes, që vijon të mbjellë koronavirusi, Kisha na fton sot të lutemi për të gjithë ata, që duan t’i shërbejnë Zotit me besnikëri e dashuri. Kremtohet, pra, sot Dita e 57-të Botërore e lutjes për thirrjet. Ditë për të cilën Papa shkroi mesazhin me temë: “Fjalët e thirrjes”, që u bë i njohur më 8 marsin e kaluar .
Lutje për thirrjet, në mbarë botën
Dita kremtohet në mënyra të ndryshme, në vise të ndryshme të botës. Për shembull, në Portugali, ipeshkvi i Portos, imzot Manuel da Silva Rodrigues Linda, i ftoi të rinjtë të luten për “t’ua ngrohur zemrat” njerëzve që takojnë. Në Irlandë, imzot Alfonso Cullinan, ipeshkëv i Waterford e Lismore, ftoi për lutje që sa më shumë të rinj t’i përgjgjen me një “po” të vendosur thirrjes së Zotit. E vetë ipeshkvi u lut “Të rizgjohet në të gjitha zemrat dëshira për t’i shërbyer Zotit e për të shërbyer në Kishën e Tij”. Kështu edhe episkopati i Kolumbisë. Ndërsa Spanja ftoi për t’u lutur në shtëpi. e, në Gjermani, motoja e lutjes për thirrje të reja ishte: “Hidhi rrjetat tua!”.
Në provë, bashkim e afërsi
Janë katër, fjalët kyçe, që propozon Papa në mesazhin për këtë Ditë, kujtuar në Letrën drejtuar meshtarëve vitin e kaluar, me rastin e 160 vjetorit të vdekjes së Famullitarit të Shenjtë të Arsit, Shën Gjon Vianejt: dhimbje, mirënjohje, guxim, lavdërim. Terma më aktuale se kurrë sot, kur po jetojmë emergjencën e një sëmundjeje, që vijon të trondisë botën. Pasqyrë e ndjenjave të misionarëve, posaçërisht atyre saverianë, të thirrur për të shkuar në skajet më të harruara të botës, ku humbën 20 sivëllezër vetëm në 40 ditë. Ditë, kur fjala më e përshtatshme për të forcuar thirrjen, është “Guxim! Zoti është me ne, edhe në kulmin e stuhisë!”.