DBR-ja dioqezane, në kohën e pandemisë: “Ngreju në këmbë! Edhe nga shtëpia mund të jesh protagonist!”
R. SH. - Vatikan
Përmes Mesazhit kushtuar kësaj Dite, titulluar “Ngreju në këmbë! Edhe nga shtëpia mund të jesh protagonist!”, Papa u foli përsëri të rinjve për Jezusin, që e prek tjetrin, për t’i komunikuar jetën. Jezusin, që prek kufomën e një të riu e depërton në realitetin e dëshpërimit, për të qarë me atë, që qan. E thotë: Vetëm kështu mund të jeni të lum!
Na çudit sivjet tema e zgjedhur “I ri, ty po të them, ngreju!” e jo më pak tema e vitit të ardhshëm: “Ngreju, po të bëj dëshmitar të asaj, që ke parë”, e ajo e Takimit Botëror të Lisbonës: “Maria u ngrit e shkoi me nxitim”, vijim i temës së DBR-s së Panamasë. Temat flasin vetë e na kujtojnë se Papa vijon t’i ftojë të rinjtë ta lënë Zotin e ngjallur t’i prekë në zemër e të jetojnë me entuziazmin, me shpresën e bujarinë, që karakterizon rininë.
Fjala “Ngreju”, në kuptimin biblik të tekstit orgjinal të Lukës, ka kuptimin e ringjalljes, të rizgjimit të jetës, për të cilin kanë aq shumë nevojë të rinj e pleq, në këtë kohë kur flitet për vdekjen, e kremtohet Ringjallja!