Të meditojmë me Ungjillin e së Dielës I të Kreshmëve 'A'
R.SH. - Vatikan
“1 Shpirti i Hyjit e çoi Jezusin në shkreti që ta tundojë djalli. 2 Dhe, pasi agjëroi dyzet ditë e dyzet net, në fund pati uri. 3 Atëherë iu afrua tunduesi dhe i tha: ‘Nëse je Biri i Hyjit, urdhëro që këta gurë të shndërrohen në bukë!’ 4 Por Jezusi iu përgjigj: ‘Shkrimi shenjt thotë: ‘Njeriu nuk jeton vetëm prej buke, por prej çdo fjale që del nga goja e Hyjit’’.
5 Atëherë djalli e mori dhe e çoi në Qytetin e shenjtë, e vuri në majë të Tempullit 6 dhe i tha: ‘Nëse je Biri i Hyjit, hidhu poshtë, sepse Shkrimi shenjt thotë:
‘Për ty Hyji do t’i urdhërojë engjëjt e vet, dhe ata do të mbajnë para duarsh…’. 7 Jezusi iu përgjigj: ‘Porse Shkrimi shenjt thotë edhe: ‘Mos e sprovo Zotin, Hyjin tënd!’ 8 Djalli e çoi sërish në një mal shumë të lartë, ia dëftoi të gjitha mbretëritë e kësaj bote… 9 e i tha: ‘Të gjitha këto do t’i jap nëse bie përmbys para meje e më adhuron’. 10 Atëherë Jezusi tha: ‘Ik, o djall, sepse Shkrimi shenjt thotë: ‘Adhuro Zotin, Hyjin tënd, dhe shërbeji vetëm Atij!’”.
Të lutemi së bashku:
O Zot Jezu Krisht,
më kanë mësuar t’u iki tundimeve.
Ndërsa Ti duket sikur shkon e i kërkon,
madje, me bashkëpunimin e Shpirtit Shenjt!
Po, e di, unë jam vetëm njeri,
e mëkate, bëj sa të duash.
Madje, janë po ato, gjithmonë,
nuk arrij të ndalem e shpesh, bie në to me të dyja këmbët.
E atëherë, dorëzohem, jetoj me to
e me një fill zëri të kërkoj falje,
ose përpiqem t’i harroj
me shpresën e vagullt se edhe Ti bën kështu.
Tani, më jep të kuptoj se po gaboj edhe perspektivën.
Atit Qiellor nuk i interesonin aq pengesat
për të cilat Ti ishe i vetëdijshëm:
priste vetëm që Ti ta kuptoje veprën e djallit
edhe në gjërat më të zakonshme e më të lakmuara
nga njerëzit e tu e, ndoshta - po të dyshoje - edhe nga Ty.
Prandaj, unë i varfri të lutem të ma hapësh zemrën e mendjen,
të më ndihmosh t’i shoh rrënjët e së keqes në shpirtin tim.
Jo aq veprat, sa sjelljet që kthehen në zakon.
Jo aq difektet, sa shtysat e brendshme.
Jo aq mëkatet, sa përparësitë e gabuara e vlerat e rreme.
Edhe unë kam nevojë për një shkretëtirë
që të kthehem tek vërtetësia e shembëllimit të Zotit
brenda meje.