Amerika Latine në zi. Vdiq Ernesto Cardenal, meshtar e poet
R. SH. - Vatikan
“Meshtari e poeti Ernesto Cardenal pushon në paqen e Zotit”. Me këto fjalë kryedioqeza e Managuas e dha mbrëmë njoftimin për vdekjen e tij, në moshën 95 vjeçe.
“Askush nuk mund të ma shuante etjen, veç Zotit. Gjë që Zoti e dinte, po unë jo!”. Me këto fjalë e përshkruante në kujtimet e tij, titulluar “Vida perdida”, thirrjen meshtarake, që e kishte nxitur, më 1957, të hynte në manastirin trapist të Gjetsemanit, në Kentucky, ku njohu mësuesin e tij shpirtëror, Thomas Merton. Përvojë themelore, kjo, për biografinë e tij njerëzore, shpirtërore e artistike. Aty Cardenal pati idenë e themelimit të një bashkësie arti - art popullor, art peshkatarësh e katundarësh të varfër, si mjet për t’i afruar tek Ungjilli. Kështu hyri në Nikaragua, ku u shugurua meshtar, themeloi Solentiname në një ishull të humbur të liqenit Cacibolca. Aty, në livadhin përballë kishës, ndërtuar me punë krahu, do të varroset të enjten a të premten, pas funeralit kremtuar sot në katedralen e kryeqytetit.
“Meshtar e poet” ose “meshtar-poet”, sepse ai shprehej me vargje, që e bënë një nga autorët më të njohur e më të vlerësuar të Amerikës Latine. Mistik - por siç e quante mikja e tij, poetja Gioconda Belli - me rrënjët e ngulura thellë në tokë. Kështu ishte Cardenal, në vijë të parë të njërës nga stinët më të ndërlikuara të historisë së vendit të vogël qendroamerikan, që u bë kufi i egër i luftës së ftohtë. Meshtari mbështeti së pari Frontin stalinist e pastaj hyri si ministër i kulturës në qeverinë e dalë nga Revolucioni i 1979-tës. Rrugën që zgjodhi iu desh ta paguante me largimin nga misioni meshtarak, pasi Gjon Pali II i kërkoi publikisht të largohej nga kjo detyrë.
Ndërsa më 17 shkurt 2019 nunci Waldemar Stanisaw Sommertag i komunikoi Cardenalit vendimin e Papës Françesku për ta shpenguar nga çdo masë kanonike kishtare, siç kishte kërkuar ai vetë. Meshtari i motuar e priti me gëzim të madh këtë lajm. E kremtoi menjëherë Meshën, akoma i shtrirë në krevatin, ku e kish gozhduar sëmundja.
Gjatë gjithë jetës, Cardenal përdori një armë kryesore: atë të fjalës. E kur iu afrua ora për t’u takuar me Zotin, shkroi “Njeriu u krijua për dashuri; vetëm për të dashur Krijuesin e tij. E gjithë koha, që nuk kalohet në shërbim të kësaj dashurie, është kohë e humbur!”.
Për ta kujtuar si Poet, që shumë herë qe propozuar për Çmimin Nobel, zgjodhëm poezinë e titulluar
Psalmi 5
Dëgjoji fjalët e mia, o Zot,
vërja veshin gjëmës sime.
Dëgjoma protestën Ti,
që nuk je mik diktatorësh
e nuk ua ndjek politikën.
S’ndikohesh nga propaganda
e s’ rri në shoqëri me gangsterët.
Ti nuk u beson fjalëve të tyre
as konferencave të shtypit:
Flasin për paqen pambarim,
e pambarim prodhojnë armë.
Flasin për paqen për ditë,
e tinëz përgatisin luftën.
Radiot e tyre ulurijnë
gënjeshtra gjithë natën e lume.
Shkritoret tyre janë plot
me plane kriminale
e praktika ogurzeza.
Po ti o Zot, do të na shpëtosh nga planet e tyre,
që flasin me gojë mitrolozash
e gjuhë bajonetash.
Ndëshkoji, o Zot,
Dështojau në dorë politikën,
Ngatërroji memorandumet e tyre,
pengojau programet…
Në orë të sirenës së alarmit
e di, Ti do të jesh me mua:
streha ime në ditën e Bombës.
Bekoji ata, që nuk u besojnë!
Rrethoji me dashurinë tënde,
si t’i rrethoje me tanke!
Pëkthim i lirshëm