Të meditojmë me Ungjillin e së Dielës së Kushtimit të Zotit
“22 Kur, sipas Ligjit të Moisiut, u mbushën ditët e pastrimit të tyre, e çuan në Jerusalem, për t’ia kushtuar Zotit, - 23 sikurse shkruan në Ligjin e Zotit: ‘Çdo i parëlindur mashkull le t’i kushtohet Zotit’ - 24 dhe për të dhënë flinë sikurse thuhet në Ligjin e Zotit; ‘një parë turtuj ose dy zogj pëllumbash’. 25 Në Jerusalem aso here jetonte një njeri, që quhej Simon. Ishte njeri i drejtë dhe i përshpirtshëm. Priste Ngushëllimin e Izraelit e në të ishte Shpirti Shenjt. 26 Shpirti Shenjt ia kishte zbuluar se s’do të vdiste pa e parë Mesinë e Zotit. 27 I nxitur prej Shpirtit Shenjt erdhi në Tempull. Kur prindërit e sollën Jezusin Foshnjë për të kryer rregulloren e Ligjit mbi të, 28 Simoni e mori para duarsh, falënderoi Hyjin e tha: 29 ‘Tani, o Zot, mund të lejosh të vdesë shërbëtori yt në paqe sikurse the ti vetë, 30 sepse me sytë e mi e pashë shëlbimin 31 që ti e bëre gati në sy të të gjithë popujve: 32 Dritën që bën të njohin Ty paganët e që i jep nder popullit tënd, Izraelit’”.
Të lutemi së bashku:
Pikërisht aty, në Tempull,
vendi më i shenjtë i Jeruzalemit,
Ty, o Jezus, të njohin
si i Shumëprituri, si Mesia i kërkuar me lutje
si Ai, që do t’i paraqitej jo vetëm Izraelit,
por gjithë njerëzimit, edhe paganëve.
Jozefi e Maria të çuan atje,
sepse zbatonin Ligjin e Moisiut
e kështu, pranonin se një fëmijë
nuk është pronë e prindërve,
por dhuratë e Zotit, e mirësisë së Tij,
dhuratë për t’u ruajtur,
dhuratë për t’u rritur,
dhuratë për t’u përgatitur për jetën.
E kush më shumë se ty, o Jezus,
është vërtet e plotësisht dhuratë e Zotit?
Atë ditë, në tempull,
Shpirti Shenjt udhëhoqi dy të moshuar,
Simeonin dhe Anën, në takimin
më të dëshiruar të jetës:
në Ty, o i vogli i njeriut, vetëm 40 ditësh,
ata e ndienë se premtimi i Hyjit
më në fund, bëhej realitet.
E kjo i gëzoi, pasi e dinin
se Zoti është besnik dhe realizon gjithmonë
shumë më tepër nga sa guxojmë të shpresojmë.
O Jezus, dua edhe unë të ndaj me ta
gëzimin e takimit,
një takim, që e ndryshon
e vijon ta shndërrojë jetën time.
Po, Ti je drita, që e zhduk errësirën,
dritë, që jep zemër, që shndrit udhën,
dritë, që rindez shpresën.