Bari, të mjekohen plagët e Mesdheut
R. SH. - Vatikan
“Kisha, në dialog me shoqërinë civile”. Kjo ishte tema e ditës së tretë të punimeve të Takimit të ipeshkvijve e patriarkëve nga vendet e lagura prej Mesdheut. Temë, që u shtjellua me hollësira shumë të ndërlikuara. Edhe të dhimbshme. Duke u nisur nga migrimet e ngarkuara me vdekje, nga luftërat e pafundme, si ajo siriane, nga varfëria në rritje, që vijon t’i mbërthejë në kthetrat e saj popujt e Mare Nostrum e deri tek krizat shkatrrimtare ekonomike e politike.
Mesdheu, vendimtar për botën globale
Diskutimi dhe ballafaqimi i sotëm sinodal nisi me referatin e hyrjes, besuar profesor Adriano Roccucit, pedagog i historisë bashkëkohore në Universitetin Roma Tre. Analiza e referuesit të ditës së sotme u nis nga një fakt i pakundërshtueshëm: “Mesdheu është shndërruar në një kuadrant vendimtar për zhvillimet e botës globale. Të flasësh për Mesdheun, do të thotë të ballafaqohesh me një univers shumëformësh”. Profesor Roccucci vuri theksin jo vetëm mbi përgjegjësitë e politikës dhe të shoqërisë, por edhe të njeriut, që beson. “Të krishterët kanë një përgjegjësi të veçantë në këtë kohë të vështirë - kujtoi referuesi. - Duhet të bëjnë të mundshmen e të pamundshmen për të lehtësuar fundin e luftërave e për të favorizuar proceset e pajtimit”. Po si ta bëjnë? Referuesi u tregoi prelatëve edhe rrugën, ndoshta kryesoren: “Për ta luftuar urrejtjen dhe paragjykimin, duhen përshkuar rrugët konkrete e guximtare të dialogut dhe të miqësisë”.
Fortlumturia e Tij, Sedrak: në Egjipt situata po përmirësohet
Një dëshmi e drejtpërdrejtë nga viset, ku ka edhe shenja shprese, e solli Fortlumturia e Tij, Ibrahim Isaac Sedrak, patriark i Aleksandrisë së koptëve. “Pas dhunës së vëllezërve myslimanë, situata në Egjipt po përmirësohet. Tani vendi po ecën, po përparon - tregoi - Elementi themelor është ndjenja e përkatësisë, e qytetarisë. “Unë mund të jem i krishterë e tjetri mysliman: por të dyja palët jetojmë të njëjtat sfida, të njëjtat gëzime, të njëjtat vështirësi. Kjo na ndihmon shumë të flasim me një gjuhë të re”.
E për ta kuptuar se Kisha egjiptiane jeton në harmoni, nënvizoi një fakt tejet të rëndësishëm për një pakicë, si ajo e krishterë: “Edhe sot mund t’i kemi kishat tona, duke i legalizuar ekzistueset”. Një hap themelor për bashkëjetesën paqësore.
Ipeshkvijtë “në mision” ndër famulli
Pas tryezave të ballafaqimit dhe diskutimit plenar, disa nga ipeshkvijtë e patriarkët sonte do të shkojnë ‘në mision’ në një mori famullish të dioqezës bareze, për të shkëmbyer me popullin dhe besimtarët biseda mbi temat e takimit. Por edhe për të kremtuar me ta Meshën Shenjte. Një mënyrë takimi e njohjeje reciproke, sipas ndjeteve të ipeshkvit të Bari-Bitontos, imzot Francesco Cacucci.
