Bartolomeu: e fortë, dëshira për bashkimin e Lindjes me Perëndimin
R. SH. - Vatikan
“Gjithë të krishterët i përkasin së njëjtës hapësirë shpirtërore. Lindja dhe Perëndimi nuk janë njësi të pavarura, të zotët e vetvetes. Nuk mund të perceptohen të ndarë, sepse kanë një të kaluar të përbashkët, vijnë nga një traditë e përbashkët, që u deformua e u copëzua gradualisht”. Kështu u shpreh Patriku i Kostandinopojës, Bartolomeu, duke cituar një teolog ortodoks, ndërsa fliste me delegacionin e Kishës së Romës në Stamboll, me rastin e festës së fronit të Patrikut Ekumenik.
Lidhje me frymën e paqes e të dashurisë
Vizita e delegacionit, kryesuar nga kardinali Kurt Koch, kryetar i Këshillit papnor për nxitjen e unitetit të të krishterëve - shpjegoi Bartolomeu - flet vetë për lidhjen e paqes e të dashurisë, që ruhet në unitetin e Shpirtit Shenjt e është simbol i dëshirës sonë të fortë, të përbashkët, për t’u bërë “një kelk i vetëm”!
Udha e “kelkut të përbashkët”
Qysh nga përqafimi i Palit VI me Atenagorën, në Jeruzalem, në vitin 1964, deri tek organet e dialogut teologjik, që merren me traditat e përbashkëta e me të drejtën kanonike, “kishat tona kultivuan dialogun e dashurisë e edhe dialogun e vërtetësisë”, pohoi me forcë Patriku i Kostandinopojës, “duke ecur kështu, drejt “udhës së një kelku të përbashkët”.
Ekumenizmi i shenjtorëve
Me rëndësi, edhe ekumenizmi i Shenjtorëve, sepse nderimi i relikeve mund të ndihmojë për t’i përfshirë besimtarët në rrugën e angazhimit e të dialogut. Është gjë e bukur dhe e rëndësishme, takimi i liderëve të Kishave, por do të ishte edhe më e rëndësishme që këtë ta bënte populli i besimtarëve. Në këtë drejtim, nuk mund të mos e falënderojmë vëllain tonë, Papën Françesku që, me dhurimin e disa relikeve të Shën Pjetrit Patriarkanës, bëri një gjest ekumenik profetik. Duke ribashkuar në Stamboll vëllezërit Pjetri e Andreu, Pajtor i Kishës së Kostandinopojës, gjesti inkurajon “për vijimin me entuziazëm edhe më të madh të udhës sonë drejt bashkimit aq të dëshiruar”.