Të meditojmë me Ungjillin e së dielës së 32-të të vitit kishtar 'C'
R.SH. - Vatikan
“27 Iu paraqitën disa saducenj… dhe i bënë Jezusit këtë pyetje: …29 'Tashti, ishin shtatë vëllezër. I pari u martua e vdiq pa fëmijë. 30 Edhe i dyti 31 edhe i treti e mori gruan e tij e kështu me radhë të shtatët nuk lanë fëmijë e vdiqën. 32 Në fund vdiq edhe gruaja. 33 Tashti, kjo grua, në ringjallje, e cilit do të jetë, sepse të shtatët e patën grua?’
34 Jezusi u përgjigj: ‘Bijtë e kësaj bote marrin gra ose burra. 35 Kurse, ata që u gjetën të denjë të kenë pjesë në atë botë e në ringjallje të të vdekurve, as s’marrin gra as s’marrin burra… 37 E se të vdekurit do të ringjallen, vetë Moisiu e shënoi në fragmentin ‘mbi kaçubën’, në të cilin e quan Zotin ‘Hyji i Abrahamit, Hyji i Izakut, Hyji i Jakobit.’ 38 Hyji nuk është Hyj i të vdekurve, por i të gjallëve, sepse të gjithë për të jetojnë’”.
Të lutemi së bashku
Eh, e kishin menduar mirë historinë:
një grua, që martohet shtatë herë
s’është diçka, që e dëgjon përditë.
Mendo sa do të kenë qeshur nën hundë
duke ta përgatitur këtë kurth, o Zot:
Të shohim, si do të na përgjigjet!
A do të arrijë të dalë nga sikleti?
Njerëzit do të na dëgjojnë ne, pa dyshim.
Do ta kuptojnë se është e kotë të flitet për jetën e amshuar.
O Zot, ta servirën mirë historinë,
gjoja se po këshilloheshin me Ty,
se po të pyesin me nderim,
për shkak të urtisë Tënde.
Por, finalja ua tradhton shijet e tyre teatrale:
E kujt do të jetë kjo grua,
sepse që të shtatë e patën bashkëshorte?
Mëkat! Harruan një detaj të vogël,
u shpëtoi një aspekt që,
në arsyetimin e tyre,
ishte krejt i natyrshëm:
e imagjinuan jetën e amshuar
si zgjatjen e thjeshtë
të gjithçkaje ndodh këtu në tokë.
E, rrëshqitën keqas
mbi këtë lëkurë bananeje.
E Ti përfitove, o Jezus,
për t’ua zgjeruar horizontin
e për t’u vënë përpara
mirësinë e një Zoti, që e do jetën,
e një Zoti, që i thërret të gjithë në jetë,
e një Zoti, që e mbron atë,
e një Zoti, që e bën të lulëzojë
në një jetë të re, të ndryshme nga e sotmja,
të mbushur me bukuri, të pasur me risi:
jeta e amshuar.