Sot, Nata e Festës liturgjike të të Lumëve shqiptarë
R. SH. - Vatikan
Sot, 4 nëntor 2019, është dita, që na kujton Meshën e parë të pas diktaturës si dhe kremtuesin e saj, dom Simon Jubanin. E po sot, nata e festës liturgjike të 38 të Martirëve, që u shpallën të Lumë më 5 nëntor 2016, në Katedralen e Shkodrës.
Përfundoi edhe nëntëditshja, që u kushtohej të Lumëve, kremtuar nga e gjithë Kisha në Shqipëri.
Mbrëmësorja e parë përkujtimore, me liturgjinë e Dritës, u kremtua sot, në Manastirin e Shën Kjarës, në atë të Stigmatineve dhe të Shën Françeskut në Gjuhadol.
Një veprimtari domethënëse përkujtimore e këtyre datave, ishte edhe Oratori me titullin simbolik “Rroftë Krishti Mbret”, shfaqur më 2 nëntor, në Kishën e Shën Françeskut, në Shkodër.
Në skenë, brohoria “Rroftë Krishti Mbret”, e fundmja e Martirëve, para pushkatimit, e brohoria e parë e besimtarëve të pranishëm në Meshën e parë, në Rrmaj!