Cerca

Vatican News
Pesë të Lumët, që do të shpallen shenjtorë të dielën Pesë të Lumët, që do të shpallen shenjtorë të dielën  (Vatican Media)

Shpallen shenjt, kardinali Newman, “Mamma Roma” dhe “Nënë Tereza” e Brazilit

Përveç kardinalit Newman, themelues i Oratoriumit të Shën Filip Nerit në Angli, do të jetë edhe shenjtja e parë romane e kujdesit shëndetësor (Mamma Roma), si edhe “Nënë Tereza” e Brazilit, ndërmjet pesë shenjtorëve të rinj, që do të kanonizohen nga Papa Françesku, ditën e diel, 13 tetor, ndërsa në Vatikan, vijon Sinodi për Amazonën.

R.SH. - Vatikan

“Vazhdoni të bëni mirë, edhe nëse nuk e di njeri”: kështu e përmblodhi motër Maria Bernadette Rossoni, postulatore e çështjes së shenjtërimit të nënë Giuseppina Vannini-t, themeluese e Bijave të Shën Kamilit - gjatë takimit me gazetarët në Sallën e Shtypit të Vatikanit – mesazhin e shenjtes së parë romane të shëndetësisë, për të cilën kryeqyteti italian po “vishet për festë”, me nisma të ndryshme përgatitore. E Lumja Vannini, shpjegoi murgesha, “qëndroi pranë të sëmurëve deri në fund të jetës dhe, akoma sot, është për ne nxitje e shkëlqyer për të shprehur këtë veçori: dashurinë e nënës, ëmbëlsinë e nënës ndaj atyre që vuajnë dhe kanë nevojë për kujdesin tonë”.

Lidhur me rolin e grave në Kishë, për të cilin po flitet shumë edhe në Sinodin për Amazonën, rregulltarja braziliane nënvizoi: “Roli i grave në Kishë është i rëndësishëm dhe askush nuk mund t’ua mohojë: pavarësisht nëse njihet apo jo, gruaja ka vendin e saj të pazëvendësueshëm në Kishë dhe në shoqëri”.

Dulce Lopes Pontes

Paolo Villotta, postulatori i çështjes së shenjtërimit të Dulce Lopes Pontes, dëshmoi “gëzimin dhe mirënjohjen e brazilianëve për kanonizimin e një gruaje, që prej kohësh konsiderohet shenjtore e kohës sonë”, aq sa quhet “Nënë Tereza e Brazilit”. “Është rastësi e bukur që kanonizimi bëhet pikërisht gjatë Sinodit për Amazonën”, shtoi postulatori: “Ajo është gruaja e parë e epokës moderne, që shpallet shenjte në Brazil”.

John Henry Newman

Për shenjtorin e parë jo-martir anglez foli atë Ignatius Harrison, përgjegjësi i Oratoriumit të Birmingamit, i cili vuri në dukje se “e gjithë jeta e John Henry Newman ishte kërkimi i vazhdueshëm i shenjtërimit dhe i së vërtetës, jo abstrakte, por në kuadrin e fesë dhe të jetës së krishterë”.

Të dielën, në meshën e orës 10.15, Papa Françesku do të shpallë shenjte edhe dy gra të tjera: motër Maria Teresa Chiramel Mankidiyan, themeluese e Kongregatës së Motrave të Familjes Shenjte, si edhe Margarita Bays, virgjër e Urdhërit të Tretë të Shën Françeskut të Asizit.

11 tetor 2019, 15:05