ND.K.V: Fëmijët thonë rruzaren për paqen dhe meshtarët e zhdukur
R. SH. - Vatikan
Do t’u kushtohet meshtarëve të vrarë e të rrëmbyer në vende të ndryshme të botës gjatë vitit të kaluar, edicioni XIV i lutjes, titulluar “Një milion fëmijë thonë rruzaren për unitetin dhe paqen”, organizuar nga Fondacioni i së drejtës papnore “Ndihmë për Kishën që Vuan”. Më 18 tetor fëmijët e 18 vendeve të botës, do të bashkohen në lutje në shkolla e në çdo vend, për të thënë lutjen mariane, në emër të paqes.
Lutje edhe për atë Maccalli-n
“Sivjet vendosëm t’u kërkojmë këtyre fëmijëve të luten jo vetëm për paqen në botë! Do të kenë edhe një ndjet të veçantë sivjet: do ta thonë rruzaren edhe për të gjithë meshtarët që, në të katër anët e botës, dhuruan jetën, pësuan dhunë e persekutime, në shumicën e rasteve vetëm e vetëm pse i përkisnin - e i përkasin - Jezusit” - pohon Alessandro Monteduro, drejtor i NDKV Italia. “Ndërmjet tyre - shton - kërkojmë që në Itali të kujtohet gjatë rruzares, atë Pierluigi Maccalli, i cili prej më se një viti ndodhet në duart e rrëmbyesve, sepse merrej kryesisht me fëmijët në misionin e tij, duke ia kushtuar gjithë jetën shkollimit të të vegjëlve”.
Lutja e fëmijëve arrin tek froni i Zotit
Nisma, që vitin e kaluar i kushtohej Asia Bibit, gruas pakistaneze të dënuar me vdekje për blasfemi e pastaj të liruar, frymëzohet nga fjalët e Shën Piut nga Pietrelecina, që na kujton se “po të luteshin një milion fëmijë së bashku, bota pa dyshim do të ndryshonte”. Ideja - shpjegon akoma Monteduro - lindi në vitin 2005 në atë, që sot njihet nga e gjithë bota si Karakasi, në Venezuelën e shumëvuajtur, ku një grup fëmijësh lutej para shtatores së Zojës. Disa nga gratë e pranishme e ndjenë fort praninë e Marisë e, një prej tyre, kujtoi profecinë e Atë Piut: “Nëse një milion fëmijë do të thonë njëzëri rruzaren, bota do të ndryshojë!”.
Fjalë, që flasin vetë për besimin e patundur në lutjen e fëmijëve.
Vetë Zoti Jezus vijon të na kujtojë: “Nëse nuk do të bëheni si fëmijët, nuk do të mund të hyni në mbretërinë e qiellit!”.
Rruzarja, në 25 gjuhë
Ndihmë për Kishën që Vuan, përmes 23 selive të saj kombëtare - lexohet në një komunikatë - i fton prindërit, mësuesit dhe të gjithë ata, që punojnë në shkolla, foshnjore, spitale, jetimore e kudo mblidhen grupe fëmijësh, ta thonë së bashku rruzaren. E për këtë qëllim, përgatiti edhe një doracak në 25 gjuhë, për t’i ndihmuar fëmijët në lutje.
Urojmë që në këtë nismë të bashkohen dhe zërat e fëmijëve shqiptarë, kudo që janë, me ndjetet e mësipërme, me një shtesë të vogël pas fjalëve profetike të Atë Piut, që të kujton situatën e vështirë: “Nëse shqiptarët e vegjël do ta thonë njëzëri rruzaren, edhe viset shqiptare do të ndryshojnë!”.