Të meditojmë me Ungjillin e së dielës XXII të vitit kishtar
R.SH. - Vatikan
“7 Duke vënë re se si të grishurit zgjidhnin vendet e para, Jezusi u tha këtë shëmbëlltyrë:
8 ‘Kur ndokush të të ftojë në dasëm, mos u ul në krye të vendit… shko e rri në vendin e fundit që, kur të vijë ai që të ka grishur, të thotë: ‘Mik, ngjitu më lart’. Atëherë ke për të qenë i nderuar në sy të të gjithë të grishurve. 11 Vërtet, kushdo e lartëson veten do të përvujtërohet e kush e përvujtëron vetveten do të lartësohet’.
12 Ai iu drejtua edhe atij që e kishte grishur: ‘Kur shtron drekë ose darkë, mos i thirr miqtë e tu, as vëllezërit e tu, as farefisin tënd, as fqinjët e pasur, sepse mund të ndodhë që edhe ata të thërrasin ty për ta kthyer nderën e kështu ta shpërblejnë. 13 Por, kur të bësh gosti, grish skamnorë, të gjymtë, të çalë e të verbër. 14 Atëherë do të jesh i lum, sepse këta nuk kanë me çka ta kthejnë dhe do të shpërblehesh në të ngjallur të të drejtëve”.
Të lutemi së bashku
Nuk të shpëton asgjë, o Jezus!
Është e vërtetë: u vërsula drejt vendeve të para,
por është çështje përparësish
se të gjithë i njohin meritat dhe rolin tim!
Nuk jam i ftuar i çfarëdoshëm,
s’mund të më lënë në një qoshe, gati jashtë derës!
Jam i vetëdijshëm për të gjitha të mirat
që kam bërë për të tjerët,
për çdo gjë, që kam shpenzuar për bashkësinë,
e fundja, kam të drejtë të shpërblehem disi për këtë.
Po, jam bujar – e thonë të gjithë –
po s’mund të heq dorë nga ndonjë përfitim i vogël.
Jam bujar me të pushtetshmit,
sepse është e vetmja mënyrë që të më lënë rehat.
Jam bujar me eprorët,
sepse dua të bëj karrierë.
Jam bujar me ata, që i përkasin rrethit tim,
që kanë të njëjtin nivel shoqëror me mua,
sepse e di se kështu, nuk i harxhoj paratë kot:
jap e marr, ftoj e më ftojnë,
shpenzoj, por pastaj, u takon atyre të shpenzojnë për mua.
E më ngjan e çuditshme, kjo mënyra jote për t’i parë gjërat!
Ti, o Jezus, do të doje që të ftoj nëpër drekëra e darka
të varfërit, të gjymtët, të çalët e të verbërit?
E ç’përfitim mund të kem
nga këta të shkretë, që s’kanë
asnjë dyshkë në xhep?
E pastaj, me tregon vendin e të fundmëve,
të atyre që s’i llogarit kush,
të atyre që shërbejnë vetëm si kornizë
nëpër drekërat e nëpër mbledhjet e rëndësishme
e unë u dashka të ulem aty?
Po a është e vërtetë që vetëm aty
mund të të takoj?
E se vetëm duke grishur skamnorët
do të kem fatin të të ftoj edhe Ty?