Ndihmë për Kishën që Vuan nis një fushatë të re solidariteti për të krishterët sirianë
R. SH. - Vatikan
“Lufta në Siri nuk ka marrë fund”. E Fondacioni Papnor 'Ndihmë për Kishën që Vuan' nuk dorëzohet, madje rebelohet kundër indiferencës, duke i ndihmuar përsëri, me të gjitha forcat, pakicat e persekutuara. Drejtori i NDKV, Alessandro Monteduro e shpjegon, me këto fjalë, domethënien e nismës së re të Fondacionit, që po mbështet dy projekte, në ndihmë të të krishterëve sirianë. “Mënyra e vetme për t’iu përgjigjur shtypjes, është t’i ndihmosh pakicat: posaçërisht pakicat fetare e, më shumë nga të gjitha, pakicën e krishterë, më e varfra e më e shtypura”- pohon.
Siria, prania françeskane, shenjë shprese
Projekti i parë do të realizohet në Haleb, ku vite të tëra konflikti lanë pas plagë të thella e të dhimbshme. E ardhmja, për shumëkënd, është dramatikisht e paqartë, edhe për shkak të situatës shumë të vështirë ekonomike. NDKV iu përgjigj thirrjes së imzot Georges Abou Khazen, mëkëmbës apostolik i Halebit të latinëve, i cili kërkoi ndihmë për blerjen e pakove me ushqime, për t’ua shpërndarë familjeve të krishtera më të varfra. “Sirianët sot nuk janë më në kërkim të lirisë - vijon Alessandro Monteduro në intervistën dhënë Vatican News. - Sot kërkojnë bukën e përditshme, ujin, gazin për të gatuar, ndonjë litër karburant e, sidomos, ilaçe. Ne përpiqemi t’u japim një dorë në këtë drejtim e u kërkojmë bamirësve tanë, që shquhen për bujari fenomenale, t’i ndihmojnë edhe një herë këta vëllezër, që kanë gjithnjë pranë françeskanët.
Projekti i dytë i takon Damaskut, ku ka shumë të krishterë të sëmurë që, ndonëse kanë nevojë për mjekime të vazhdueshme, nuk mund t’i blejnë ilaçet, sepse kushtojnë tepër shtrenjt. Patriku i Kishës së Antiokisë së Greko-Melkitëve, Youssef Absu, i kërkon ndihmë Fondacionit për blerjen e ilaçeve dhe për asistencën e të sëmurëve në shtëpitë e tyre.
Të krishterët janë ndërtues urash
Nga viti 2011, kur nisi lufta në Siri, e deri më 2018, Ndihmë për Kishën që Vuan u ka dhuruar 30 milionë e 400 mijë euro kishave vendase e, në shumë nga zonat, ku është e garantuar siguria, nisi realizimin e planit për rindërtimin e kishave të shtëpive. “Çka duhet bërë - shton Monteduro - është përpjekja që njerëzit ta kuptojnë se ndihma, që u jepet këtyre pakicave në Lindjen e Mesme, është mjet i jashtëzakonshëm, vaksinë e jashtëzakonshme kundër virusit të shtypjes e të fundamentalizmave, sepse të krishterët jo vetëm që janë paqësorë por, mbi të gjitha, janë paqëtues, të aftë për të ndërtuar ura dialogu!”.
Në Siri vijon të derdhet gjak
Ndërkaq në kronikat e Sirisë shkruhen ende faqe të reja dhune. Dje vdiqën 4 ushtarakë qeveritarë e 14 të tjerë u plagosën, në një atentat me dinamit, në zonën jugore të Daraa. Ndërsa një ditë më parë humbën jetën 11 civilë, ndërmjet të cilëve, tre fëmijë, gjatë një sulmi ajror në zonën e Idlib-it.