Filipinasi Gerard Timoner III, mjeshtri i ri i Urdhërit të Predikatarëve
R. SH. - Vatikan
Gerard Francisco Timoner III, 51 vjeç, filipinas, është i pari aziatik, që do t’u prijë domenikanëve. “Esenca e Kishës - tha menjëherë pas emërimit -është bashkimi, që konkretizohet në mënyrë të jashtëzakonshme, kur sivëllezërit kremtojnë së bashku Eukaristinë”.
Bashkim vëllezërish
“Ne, domenikanët, duhet t’i shërbejmë Kishës me gjithë çka jemi: domethënë, si bashkim vëllezërish. Duhet ta ndihmojmë Kishën të bëhet bashkim i fuqishëm. Pa shikuar vazhdimisht veten, por Kishën, të cilën duhet ta ndihmojmë të shërbejë e të ndërtojë!”. “Sivëllezërit, kur erdhën të më urojnë menjëherë pas zgjedhjes - shtoi - më thanë se do të luten për mua, e kjo më mbushi me guxim për ta kryer sa më mirë misionin tim”.
Një vështrim jo evropian
Per Miguel Ángel del Río, mëkëmbës i Mjeshtrit të Urdhërit, Gerard Timoner III mund t’i sjellë shumë gjëra të mira domenikanëve, ndërmjet të cilave, një vështrim jo evropian. “Shumica e mjeshtrave të Urdhërit kanë qenë evropianë, i kanë parë me sy evropian problemet. Ai sigurisht do t’i shikojë me një sy tjetër, aziatik”- kujtoi.
Më 2014-tën mjeshtri i ri i domenikanëve u zgjodh nga Papa Françesku anëtar i Komisionit teologjik ndërkombëtar, themeluar nga Pali VI më 11 prill 1969, për të ndihmuar Selinë e Shenjtë në shqyrtimin e çështjeve doktrinore më të rëndësishme e më aktuale.