Të meditojmë me Ungjillin e së dielës
R.SH. - Vatikan
Ja fjalët e Ungjillit të festës së Trinisë Shenjte nga Gjoni 16, 12-15:
“12 Kam edhe shumë të tjera për t’ju thënë por tani s’mund t’i kuptoni. 13 E kur të vijë ai ‑ Shpirti i së Vërtetës ‑ Ai do t’ju udhëzojë ta njihni tërë të Vërtetën. Ai s’do të flasë prej vetvetes, por do të flasë çka të dëgjojë dhe do t’ju zbulojë të ardhmen. 14 Ai do të më lëvdojë, sepse do të marrë prej simes e do t’ju zbulojë juve. 15 Gjithçka ka Ati, është imja. Prandaj edhe ju thashë: ‘Do të marrë prej simes dhe do t’jua zbulojë juve’.”
Të lutemi së bashku
O Zot, Atë, Bir e Shpirt i Shenjtë,
Hyj që je një i vetëm, një Zot,
e njëkohësisht je Trini,
Misteri yt nuk duhet kuptuar
është marëdhënie për t’u jetuar.
Ti je Ati e më do si birin tënd:
portën e shtëpisë e ke gjithnjë hapur për mua.
Je gati të më presësh, edhe kur largohem
duke përplasur derën e duke sharë me të madhe.
Ti je gati të më dëgjosh
edhe kur kthehem pis e copë-copë
edhe kur e harxhoj kot gjithë thesarin, që ma le në dorë.
Je gati edhe të më kërkosh gjithandej
ashtu siç bën bariu me delen e humbur,
për të vetmen arsye se më do fort: ti je Ati im.
Ti je Biri, bërë njeri si unë
pra, vëlla me të gjithë njerëzit,
e çdo kohe e të çdo vendi.
Ti je vëllai, që derdhi gjakun
për ta mposhtur një herë e përgjithmonë
të keqen, mëkatin dhe vdekjen.
Ti je vëllai që erdhi tek ne
ashtu siç mund të vinte vetëm vëllai:
i varfër, çarmatosës e i çarmatosur,
duke sjellë me vete vetëm dashurinë, mirësinë e dhembshurinë.
Ti je Shpirti i Shenjtë, i mistershëm e i pakapshëm
si era, si fryma e jetës,
por të ndiejmë e të njohim në çdo vend të tokës,
brenda dhe jashtë Kishës.
Ti je Shpirti i Shenjtë e, nuk ka gjest fisnik
që s’është frymëzuar e mbështetur prej Teje.
Ti je Shpirti i Shenjtë e vepron në çdo burrë e në çdo grua
që ta hap zemrën dhe jetën.
Ti je Shpirti i Shenjtë e, në këtë botë të shprishur,
çon drejt plotësimit
planin e Zotit, tokën e re e qiellin e ri.