Përfundon takimi i të rinjve katolikë në Lednica. Inkurajimi i Papës
R.SH. - Vatikan
“Dashuria e Krishtit është aty ku fillon gjithçka. Dashuria e Tij mbështet dhe ushqen çdo formë tjetër dashurie”: kështu tha kryeipeshkvi Stanislaë Gadecki, kryetar i Konferencës Ipeshkvnore Polake, i pranishëm në mesin e të rinjve të mbledhur në Lednicë të Polonisë. Këtë vit, ata kujtuan 40-vjetorin e shtegtimit të parë të Gjon Palit II në atdheun e tij, kremtuar në gjithë Poloninë. Kur mbërriti në Gniezno, shenjti i ardhshëm pati thënë: “Përshëndes Poloninë, vendi i pagëzuar pikërisht këtu, njëmijë vite më parë”.
Mesazhi i Papës për të rinjtë
Ngjarja arriti kulmin në kremtimin e Eukaristisë. Para se të jepte bekimin, Primati i Polonisë i kërkoi Zojës së Lednicës t’i mbrojë të gjithë meshtarët. Të rinjve, që morën pjesë në orën e Gjon Pali II me Litanitë e Zojës dhe dëgjuan dëshminë e prof. Joseph Eiler, një çifut ortodoks, që e kishte takuar personalisht Gjon Palin II, u mbërriti edhe mesazhi i Papës Françesku.
Françesku i inkurajoi të rinjtë të dëgjojnë me vëmendje zërin e Jezusit. “ Përvoja juaj në Panamanë polake, siç paraqitet këto ditë Lednica, u mbushtë me entuziazmin e fesë, të lutjeve, të gëzimit dhe të kremtimit të përbashkët… Entuziazmi i zemrës së kthyer kah Zoti ju udhëheqtë e Hyji ju bekoftë. Ju përqafoj në lutjet e mia”.
Natë lutjesh dhe adhurimi
Gjatë gjithë natës, fushat e Lednicës u kthyen në vend lutjesh, këngësh, vallesh dhe adhurimi i të Shenjtnueshmit Sakrament. Në mëngjes, deklarata e përbashkët për të zgjedhur Krishtin, shkruar nga meshtari i ndjerë Jan Gora OP, nismëtar i lëvizjes Lednica. Si çdo vit, takimi përfundoi me kalimin e Portës së Mijëvjeçarit të Tretë nga të gjithë pjesëmarrësit. Si kujtim për takimin, të rinjtë morën me vete vulat, që simbolizojnë Shpirtin Shenjt dhe një udhë të veçantë për shqyrtimin e ndërgjegjes, bazuar në kryeveprën “Thirrja e Shën Mateut” e piktorit të njohur, Caravaggio.
Takimi Kombëtar i Rinisë në Lednicë është më i madhi për të rinjtë katolikë polakë dhe të huaj. Ky vend u zgjodh, për shkak se, sipas të dhënave historike, pagëzimi i Polonisë në fenë e krishterë u bë në ishullin Ostró Lednicki. Nismëtar i takimit rinor është Fr. Jan Góra OP, i cili vdiq në vitin 2015. Në Fushat e Lednicës ndodhen: Harku i Peshkut, i mbiquajtur Porta e Mijëvjeçarit të Tretë dhe Shtëpia e Shën Gjon Palit II, me kujtimet e Papës polak. Vitin e ardhshëm, takimi i Lednicës do të mbahet më 6 qershor.
