Motra spanjolle e vrarë në Afrikë: “Një grua më shumë, që dhuron jetën"
R. SH. - Vatikan
Imcake, e njerëzishme, absolutisht paqësore. Kështu e përshkruajnë të gjithë ata, që e njohën. Rregulltarja, 77 vjeçe, u gjend me kokë të prerë, të hënën e kaluar, në fshatin Nola të dioqezës së Berberatit, në Republikën e Afrikës Qendrore, pikërisht në lokalet, ku jepte mësimin e rrobaqepësisë, duke i mësuar vajzat afrikane të jetojnë më mirë. Trupi i saj - sipas L’Osservatore Romano – ishte copëtuar, si prej varcakut të ndonjë kasapi!
Prej vitesh punonte për t’i formuar vajzat vendase
Motra Ines i përkiste bashkësisë së vogël vendase të Bijave të Jezusit. Prej vitesh punonte në vendbanimin e madh të Prefekturës së Sangha-Mbaéré, në jugperëndim të Republikës së Afrikës Qendrore, në kufi me Kamerunin. Këtu e jetonte, me një pasion të rrallë, çdo ditë, ndërmjet pallateve e barakave, duke vijuar të japë kontributin e saj edhe atëherë, kur gjithkush çuditej me pasionin e motrës së shkuar nga mosha, që punonte si të ishte vajzë e re. “E pashë për Pashkë - tregon motra Elvira Tutolo e Motrave të Bamirësisë të Shën Giovanna Antida Thouret, prej 18 vjetësh me mision ndër viset afrikane, në Berberati. - E, ndonëse në moshë për të pushuar, nuk i shkonte as nëpër mend të largohej nga vendi i misionit.
Vrasje, ndoshta, e lidhur me trafikun e organeve
Në natën ndërmjet së dielës e së hënes, disa të panjohur hynë në dhomën e saj, e kapën dhe e zvarrisën pikërisht në lokalet ku jepte mësimet e rrobaqepësisë. Ndoshta vend simbolik për agresorët! Këtu ia prenë kokën. Shkaqet e kësaj mizorie të pashoqe, nuk dihen akoma. Askush nuk e ka marrë deri tani mbi vete autorësinë e krimit. Ndonëse vendi ku u krye, mund të flasë vetë. E madje ka shumë mundësi që kjo vrasje të ketë lidhje me tregtinë e organeve njerëzore. Shpesh ky tip veprimi konsiderohet si rit magjik, që ndihmon për të siguruar fitime, sidomos nga kërkimi i diamanteve. Ndodh që vetë prindërit e mbysin ndonjërin nga fëmijët, ose kryejnë veprime kundër natyrës, për të pasur përfitimet e dëshiruara. Është praktikë, që vjen nga Kameruni i afërt, jo rastësisht, cak i preferuar i kësaj tregtie të ndyrë. Deputeti Jean Marc Ndoukou akuzon autoritetet vendase, duke theksuar se nuk bëjnë asnjë herë përpjekjet e duhura për t’i sqaruar me fund krime të tilla, për t’i dënuar fajtorët.
Të nesërmen e ngjarjes, simotrat e rregulltares kremtuan një mbrëmësore lutjeje. Mesha e dritës u kremtua sot paradite. Tani motra Ines pushon në paqe në Afrikën e saj, nga e cila nuk deshi kurrë të largohej!