Meditim kreshmor: “Logjika e gjarpërit-e logjika e Zotit”
R. SH. - Vatikan
Shfletojmë Ungjillin e dielës së 5-të të kohës së Kreshmëve, në të cilin Gjoni ( 8,1-11) na propozon takimin e Jezusit me skribët e farisenjtë qё ia sollën para një grua të zënë në kurorëshkelj, duke kёrkuar dёnimin dhe vrasjen me gurё. Jezusi, duke falur gruan, na mёson se vetëm falja hyjnore dhe dashuria e Zotit, e pranuar me zemër të hapur e të sinqertë, na japin forcë t’i bëjmë ballë së keqes e të mos mëkatojmë më.
Meditimi i mëposhtëm mund të na shoqërojë mbasi të jemi kunguar në këtë kohë pendestare: pas takimit të gjallë, prekës, të drejtpërdrejtë me Jezusin. Sepse drejtpërdrejt e marrim nga duart e Zotit bukën e thyer, dhuratë e jetës, Korp edhe Gjak i Tij. E pajisemi me logjikën e Jezusit!
Meditim
Eshtë grua e çarmatosur
ajo, që para këmbëve tua, Jezus
e flakin farizenjtë.
Pas fytyrave të tyre fshihet
dinakëria e gjarpërit.
E gruaja fatcube
që lindi mbi tokën me gurë
e me gurë do të mbarojë,
sheh ëndrra të tmerrshme syçelë,
në pritje për t’u bërë
një grumbull gurësh
të përgjakur.
Si kishte arritë deri këtu!?
Ta mbysnin këta burra,
që deri dje e patën ledhatuar?
E s’ju duk aspak mëkat?
Si mund ta shikonin
ballë për ballë!?
Thua kishin helmin në gjak,
sepse i zuri gjarpëri?
Po ëndrra u këput!
Njeri prej tyre e mori gurin…..
Nuk mund të mohohet:
u zu në mëkat.
E di, prandaj, ç’ e pret:
do të mbytet me gurë!
E flakin para këmbëve tua, Jezus,
që ta gjykosh!
Rreth Teje skribë e farizej
që e dinë si punon ligji,
prandaj të venë në provë.
Duan ta dinë se deri ku
mund të shkojë kjo mëshira jote
për publikanë e mëkatarë
e der’te gruaja që gaboi
mes etjes për jetë
e mëkatit …
E para do të jetë mrekulluar
pikërisht kjo grua
nga sjellja jote, o Zot!
Pse s’e dënove sakaq?
Pse s’hodhe gurin e parë
përmbi atë trup
përpëlitur nga tmerri
i fundit çnjerëzor
që s’e pranon as guri?
Pse s’e zbatove
sakaq Ligjin e lashtë?
Nuk e zbatove!
e i tregove botës:
botës sate e sonës,
që pret me gurë në dorë
tjetrin ta kthejë në muranë,
se duhet të shikojmë vetveten,
e pastaj gruan;
fajet e mëkatet tona,
pastaj ta marrim gurin në dorë
për të gjuajtur tjetrin a tjetrën.
E të mos harrojmë se Ti,
nuk erdhe për të na gjuajtur me gurë,
po për të na hapur,
si i hape gruas
dhe pse e zënë në mëkat,
një udhë të re.
Udhë që na mëson
o Zot i mirë,
të mos jemi skllevër të ligjit,
për të qenë të lirë!