Një javë me Papën dhe me Kishën katolike në botë
R. SH. - Vatikan
Takimi tradicional i Papës me klerin e Dioqezit të Romës
Të enjten e kaluar, më 7 mars, në Bazilikën të Shën Gjonit në Lateran, u mbajt takimi tradicional i Papës me klerin e Dioqezit të Romës, në fillim të Kreshmëve: “Mbart mbi vete dhimbjen e tërë shkandujve, që janë në të gjitha gazetat e botës – u tha me hidhërim të thellë Papa meshtarëve të Romës. Duke shtuar:
“Të mos e humbasim guximin, Zoti po e pastron Kishën, Nusen e vet, që u kap në flagrancë, duke thyer kurorën, e po na shpëton nga hipokrizia”. Këtë theksoi në fillim të takimit me priftërinjtë e dioqezës së tij Papa, duke pasur përkrah kardinalin mëkëmbës, De Donatis.
“E ndjej se duhet ta ndajë me ju dhimbjen dhe hidhërimin e padurueshëm të shkandujve, Po ne nuk duhet ta humbasim guximin. Fjalë të ngarkuara me dhimbje – këto të shqiptuara nga Papa para priftërinjve të dioqezës së Romës, mbledhur të gjithë në Bazilikën romake.
Dialog i sinqertë
Ishte një dialog i sinqertë, me porta të mbyllura, gjatë të cilit Papa, i mbështetur nga mëkëmbësi i tij, De Donatis, kujtoi problemet më të mprehta të Kishës sot, duke shprehur besim për të ardhmen, sidomos në këtë fillim Kreshmësh, që është kohë hiri e që kërkon të vihet Zoti në qendër të jetës. Atij duhet t’i drejtohemi sy për sy - kujtoi Papa - e t’i kërkojmë të na e ruajë shpirtin tonë, pa harruar kurrë se syrit të Tij nuk i shpëton asgjë. “Ai na shikon lakuriq, ashtu si jemi. Domethënë, si të mjerë e mëkatarë, e megjithatë na kërkon të ndërmjetësojmë për vëllezërit”. Priftërinjve Papa u kërkoi një dialog të përhershëmm plot pjekuri, me Zotin. E edhe t’i marrin seriozisht mbi vete problemet e njerëzve”.
Papa: të lutemi për bashkësitë e krishtera, posaçërisht për më të persekutuarat
Në videomesazhin me ndjetet e lutjes për muajin mars, Papa thekson: “Sot kemi më shumë martirë, sesa në shekujt e parë! Prej këndej, ndjeti: “Të lutemi për të krishterët që persekutohen, kudo në botë, që ta ndjejnë afërsinë e Krishtit e t’u njihen të drejtat”. Videomesazhi për Rrejtin Botëror të lutjes, u përhap të martën e kaluar, më 5 mars, me ndjetin për muajin mars 2019.
"Ndoshta do të duket e vështirë të besohet, por sot ka më shumë martirë sesa në shekujt e parë - pohon Papa në videomesazh. - Persekutohen vetëm pse flasin të vërtetën dhe ia kumtojnë Jezu Krishtin kësaj shoqërie – shton - E kjo ndodh sidomos aty ku liria fetare nuk është e garantuar. Por edhe në vendet, që i mbrojnë lirinë dhe të drejtat e njeriut vetëm në teori e në letër. U kujtua këtë ditë edhe se liria fetare është në rrezik ndër 38 shtete
Papa Françesku: pas një viti do të hapet Arkivi i Vatikanit
Më 4 marsin e kaluar, gjatë takimit, në Sallën Klementine, me drejtuesit dhe personelin e Arkivit Sekret të Vatikanit, Papa Françesku njoftoi se arkivat e Piu XII, me vlerë të madhe edhe për historinë e Kishës në Shqipëri, gjatë periudhës tejet kritike të Luftës II Botërore, do të hapen më më 2 mars 2020. E kjo na kujton se në dokumentet e Arkivit të Piut XII mund të lexohen shumë faqe ende të panjohura edhe për historinë e Shqipërisë gjatë Luftës II Botërore e, sidomos, për martirizmin e Kishës katolike, të klerit e besimtarëve të saj. Mbetet, për shembull, për t’u sqaruar një nga çastet më kritike të Historisë së Kishës në Shqipëri. Ajo ndërmjet viteve ’49-’52, pikërisht nën papninë e Piut XII, që zgjati nga data 2 mars e vitit 1939, deri më 9 tetor 1958, duke përfshirë periudhën më kritike, atë të Statutit të Kishës Katolike Shqiptare, me synimin për ta shkëputur Kishën nga Papa. E shumëdiskutuar, mbetet ende e paqartë kjo periudhë.
Papa në Bullgari e Maqedoni: ndërmjet tjerash, një vizitë në kampin e refugjatëve
Më 7 mars u bë i njohur, nga Salla e Shtypit e Selisë së Shenjtë, programi zyrtar i shtegtimit të Papës Françesku në Bullgari dhe në Republikën e Maqedonisë së Veriut, nga data 5 deri më 7 maj. Tejet i ngarkuar, programi, me 12 fjalime, në tri ditë vizite. Ndërmjet tjerash, në lutje, para fronit të Shenjtorëve Çirili e Metodi, në katedralen patriarkale të Shën Alexander Nevsky-t, në Bullgari e, sidomos vizita, me praninë e liderëve fetarë, në Shkup, në memorialin kushtuar Nënë Terezës, - ku Papa do të thotë një lutje
Vizita e Papës Françesku në Marok, ngjarje me rëndësi historike
“Vizita e Papës Françesku në mbretërinë e Marokut, vend anëtar i ISECO, ku ndjehet fort fryma e tolerancës dhe e respektit për larmitë fetare e kulturore, përbën një ngjarje historike, të rëndësishme e me domethënie shumë të thellë”. Këtë pohon përfaqësuesi i shërbimit administrativ, Mohamed Altwaijiri, cituar në një komunikatë të ISECO (Organizmi Islamik për Edukimin, Shkencën dhe Kulturën).
Kardinali Filoni në Taiwan, Macao e Hong Kong, pas marrëveshjes Seli e Shenjtë–Kinë
Përfundoi shtegtimi i kardinalit Fernando Filoni, prefekt i Kongregatës për Ungjillëzimin e Popujve, në Taiwan, Macao e Hong Kong, nga 27 shkurt deri më 6 mars. Gjeti e la, një atmosferë shumë pozitive në gjirin e Kishës. Megjithatë - ky mendimi i prelatit të lartë, duhet më shumë angazhim misionar në mjediset ku kaloi uragani i ateizmit e, pas tij, ai i mirëqenies ekonomike. I dërguari i Papës për të marrë pjesë në Kongresin eukaristik kombëtar, kardinali Filoni, vizitoi edhe Makaon e Hong Kongun.
Në Vatikan fetë ballafaqohen për të mbështetur zhvillimin e qëndrueshëm mbi Objektivat e OKB-së.
Synimi kryesor i Konferencës ndërkombëtare “Fetë dhe objektivat e zhvillimit të qëndrueshëm: duke dëgjuar britmën e tokës dhe të të varfërve”, që u mbajt në Vatikan, kërkoi e gjeti rrugë të reja për realizmin e objektivave të këtij zhvillimi, të adoptuara nga Kombet e Bashkuara”, duke nisur nga “kontributi i madh” që mund të japin fetë. Takimi, që filloi më 7 mars, në Sallën e Re të Sinodit, organizuar nga Dikasteri për Shërbimin e Zhvillimit të Gjithanshëm Njerëzor, në bashkëpunim me Këshillin Papnor për Dialogun Ndërfetar, përfundoi dje, 9 mars.
Duke i pritur pjesëmarrësit në Konferencën kushtuar rolit të feve, në Vatikan, më 8 mars, Papa theksoi nevojën e një “kthese ekologjike” në botën aktuale. Sfidat - kujtoi- janë të ndërlikuara e grupet dhe njerëzit që besojnë, kanë një rol kyç për të luajtur në këtë kthesë. I duhet dhënë përgjigje konkrete britmës së të varfërve e të tokës, që presin zhvillim të pandarë nga drejtësia e vëllazërimi dhe objektiva ekonomike, të mbështetura nga objektiva etike. Papa theksoi edhe rëndësinë e popullsive autoktone, duke kërkuar përpjekje të përbashkëta për zhdukjen e pasojave të dëmeve të kryera”.
Në Irak, kryeipeshkvi i shkruan kryeministrit: t’i jepet fund krijimit të vendbanimeve
Në Rrafshin e Ninives, vendbanim historik i bashkësive të krishtera vendase, në trojet aktuale të Irakut, po vihen në jetë strategji urbanistike e ndërtime banesash, që i kundërvihen dëshirës së banorëve për rindërtimin e vendit pas pushtimit xhihadist. Prej këndej kryeipeshkvi siro-katolik i Mosulit, Yohanna Petros Moshe, i shkruan kryeministrit, duke theksuar se kjo politikë do të ndikonte negativisht mbi ekulibrin e popullsisë vendase.
Mbreti i Jordanisë do të jetë në Asizi, për të marrë Llambën e Paqes të Shën Françeskut
Më 29 mars, Lartmadhëria e Tij, Mbreti i Jordanisë, Abdullahu II, do të vizitojë Bazilikën e Shën Françeskut të Asizit, ku fretërit françeskanë do t’i dhurojnë Llambën e Paqes të Varfanjakut të Asizit, për impenjimin në mbrojtjen të drejtave të njeriut, të harmonisë ndërmjet feve të ndryshme dhe strehimin e refugjatëve”. Do të shoqërohet nga Mbretëresha. Të pranishëm, edhe Kancelarja gjermane Angela Merkel si dhe Kryetari i Këshillit të Ministrave të Italisë, Giuseppe Conte.