Meditim kreshmor: “Ne, plangprishësit…”
R. SH. - Vatikan
Shfletojmë Ungjillin e dielës së 4-të të kohës së Kreshmëve, në të cilin Luka ( 15,1-3.11-32) na propozon shëmbëlltyrën e djalit plëngprishës apo të atit të mëshirshëm, që na zbulon pikërisht dashurinë e pakufishme të zemrës së Zotit.
Ta falësh, atë që të plagosi; ta duash, atë që të gjakosi; ta marrësh ngrykë, atë që të braktisi; ta presësh me krahë hapur, atë që iku pa të thënë lamtumirë! E kush e bën këtë? E kush mund ta bëjë, veç Zotit? Dhe njeriut, që merr mbi shpinë kryqin e vet e ecën pas Tij? Këtyre pyetjeve i jep përgjigje e Diela IV e Kreshmëve, që na sjell aromën e Pashkëve, forcën e zbritjes nga kryqi, ëmbëlsinë e krahëve të hapur të Zotit të ngjallur, jo më në pritje për t’u kryqëzuar, por në pritje për të na shtrënguar fort në krahë, ne, plangprishësit!
Meditim:
Ku mund ta gjejmë, o Jezus
një Atë si ky
që e respekton lirinë
aq sa e përcjell me lot të birin
që niset në dhera të tjera
duke i hapur plagë?
I jep dhe pasurinë
që s’e fitoi
prandaj s’ka të drejtë ta marrë?
E ku ta gjejmë, Jezus,
një Atë si ky,
që e pret kthimin e të birit
e portën ia hap në dy kapakë
kur i troket pa petka e pa para,
humbur në skuta turpi?
Bërë hi e pluhur,
në udhët e kotësisë?
Ku mund ta gjejmë, Zot,
një atë si ky që shtron gosti
për të birin
veç pse erdh rishtas në plang,
i gjallë në krahët e atit,
pas kobit që i shkaktoi?
E dimë, o Jezus, se veç Ati qiellor
e ka këtë dashuri
të pamasë, të padëgjuar, të papritur..
aq të papritur,
sa ta zemërojë keqas,
djalin e madh,
që iu drodh, s’iu gëzua zemra
nga kthimi i plangprishësit,
ngarkuar me nam të keq.
E pa të vëllain
e hoqi vorbën me mish nga zjarri,
për të mos e ngrënë me të!
E nuk e zuri turpi,
kur e pa të gjallë në krahët e atit,
por hovi nga zemërimi:
zemërim që nis nga zanafilla e racës,
që nga Kaini.
E sjellja e t’et iu duk
një padrejtësi e padurueshme.
Të falësh mëkatarin!
Plangprishësin ta presësh me gosti… !
Po kjo tjetër s’mund të jetë
veç padrejtësi.
Për botën po, kështu është për botën
por jo për Zotin!
Logjika e Zotit nuk bazohet
mbi faje e mëkate
pse s’është logjikë njerëzore.
Logjika e Atit ngrihet veç mbi dashurinë!
Tejet e madhe, kjo dashuri,
Prej saj shpërthen hareja
e kthimit rishtas
prej tharkut të thive,
në krahët e Atit!