Himni i DBR-së Panama, 2019
R. SH. - Vatikan
Titullohet “Ja, shërbëtorja e Tënzot, u baftë me mua si është Fjala jote!”, himni zyrtar i DBR-së së Panamasë (22-27 janar 2019). Kënga, bazuar mbi ritmet tipike të kulturës panameze, u paraqit këto ditë përballë mijëra të rinjve e të rriturve, mbledhur në qendrën Atlapa të Panamasë, për darkën e Bukës e të verës, në mbështetje të Seminarit të Madh. U kompozua nga Abdiel Jiménez, katekist e psalmist i famullisë së Krishtit të Ngjallur, në San Miguelito, autor i një mori këngësh liturgjike.
Kryeipeshkvi i Panamasë, imzot José Domingo Ulloa Mendieta, shpjegoi se ky Himn na kujton misionin, për të cilin jemi të thirrur si apostuj e misionarë në këto kohë, duke ecur mbi gjurmët e Marisë. E shtoi: “Jemi entuziastë që po e vëmë në shërbim të të rinjve të mbarë botës me qëllim që, duke e kënduar, të përgatiten për DBR-në me gëzim, gati për t’u shndërruar nga Zoti”. Himni u zgjodh ndërmjet 56 kompozimeve të paraqitura. Fjala e fundit i takoi Komitetit ekzekutiv të DBR-së dhe Dikasterit për laikët, familjen e jetën. Më poshtë, teksti i Himnit përkthyer lirisht:
Ja, Shërbëtorja e Tënzot
Shtegtarë udhësh të gjata,
U nisëm nga larg pa përtuar,
Si misionarë të Tënzot,
Me Fjalën e Tij të ngarkuar!
Të jemi duam si Maria
Që “Po-në e saj na mëson,
Qielli galdon nga kënga,
E toka mrekullitë ia këndon!
Kori:
Ja, pra, Shërbëtorja e Zotit,
U bëftë mbi mua Fjala e mirë,
Pse jam edhe unë shërbëtor,
Jam jote bijë e yt bir.
E dua të jem si Maria,
Si ditët e Saj - ditët e mia!
Kori
Mos kini frikë aspak
Nga asnjë ndërrim i motit.
Çoni kudo dashuri,
Si e çoi Shërbëtorja e Zotit.
Ashtu si mbi Zojën, ndër mote
U bëftë dhe mbi ne “Fjala Jote!”.
