Thirrje e Patrikut Kirill për respektimin e lirisë fetare
R. SH. - Vatikan
Pak para se të mblidhej Sinodi i parë, që bashkoi hjerarkitë kishtare të Kishave ortodokse ukrainase, të pavarura nga Patriarkana e Moskës, Patriku i Gjithë Rusisë, Kirill, i bëri thirrje Papës Françesku, liderëve të Kishave të krishtera, qeverive të Francës, Gjermanisë e të SHBA-ve, për t’i sinjalizuar lidhur me ndërhyrjen e Shtetit ukrainas në punët e Kishës ortodokse të Kievit e për të kërkuar respektimin e lirisë fetare.
Ç’ndodhi në Sinodin e Kievit?
Pavarësisht prej kësaj thirrjeje, Asambleja e padëshiruar nga Moska, u mblodh dhe ribashkoi hjerarkitë kishtare të Kishave ortodokse të pavaruara nga Patriarkana e Moskës, miratoi statutin e Kishës së sapolindur kombëtare dhe zgjodhi primatin e saj, që do të niset në Stamboll për të marrë, nga dora e Patrikut Bartolomeu, tomos - apo dekretin formal të autonomisë.
Rrezik për episkopatin ukrainas, të lidhur me Moskën
Në mesazhin e tij, Patriku Kirill flet për rrezikun e “persekutimit” të asaj pjese të episkopatit ukrainas, që lidhet me Moskën e që nuk pranoi të marrë pjesë në Sinodin, tashmë të kryer. Letra e Kirillit, e gjatë dhe e hollësishme, kujton disa ngjarje të ndodhura në dëm të Kishës ortodokse ukrainase, të lidhur me Rusinë. Kërkon, më pas, me forcë, të mbrohet liria e ndërgjegjes dhe e fesë. I shqetësuar nga shkeljet e mundshme të të drejtave dhe lirive të të krishterëve ortodoksë të lidhur me Moskën, Patriku Kirill i drejtohet Papës Françesku; kreut të bashkësisë anglikane, kryeipeshkvit të Canterbury, Justin Welby; të nderuarit Olav Fykse Tveit, sekretar i përgjithshëm i Këshillit ekumenik të Kishave; Antonio Guterres, sekretar i përgjithshëm i OKB-së si dhe kreut të shtetit francez, Emmanuel Macron dhe kancelares gjermane, Angela Merkel, duke u kërkuar “të mbrojnë lirinë e ndërgjegjes e të fesë, të garantuara nga e drejta. ndërkombëtare”.