Nëntëditëshja e Zojës së Papërlyer (29 nëntor - 7 dhjetor) dita VIII
R: SH. - Vatikan
I tronditur rëndë nga rreziqet e kësaj jete, që shpesh ka më shumë lot se gëzime, njeriu kërkon etshëm një strehë, nën të cilën të mund të struket në ditë rrebeshesh. Kërkon gëzim, mes lotësh; breg, mes dallgësh; dritë, mes errësirës. Kërkon dorën e nënës në rrëzime, si në ditët e miturisë. Çdo njeri, deshi s’deshi, e ndjen në shpirt se veç nënës e atit, që e nxorën në dritën e kësaj bote, ka edhe një Atë e një Nënë qiellore, gati për t’ia shtrirë dorën në ditë të kthjellta e të zymta. Këtë na kujton dita e parafundit e nëntshes kushtuar Zojës së Papërlyer.
Jemi bij të Hyjit e të Marisë
Ashtu si në krijimin natyror e në atë njerëzor është një baba e një nënë, edhe në krijimin e mbinatyrshëm e shpirtëror është një baba, Hyji e një nënë, Maria. Të gjithë bijtë e vërtetë të Hyjit e besimtarët e vërtetë kanë atë Hyjin e nënë, Marinë. Kush nuk e ka nënë Marinë, nuk e ka as Hyjin atë. Prandaj ata, që nuk besojnë, që e urrejnë, e përbuzin ose nuk e përfillin Marinë, nuk mund ta kenë Hyjin atë, sepse nuk e kanë nënë Marinë: po ta kishin Nënë, do ta donin e do ta nderonin, ashtu si biri i denjë që, natyrisht, e do dhe e nderon nënën e vet, që i dhuroi jetën.
Maria, peng i besës lidhur qielli me njeriun
Maria, në të cilën mbiu Fjala e Zotit, është edhe peng i besës, që lidhi qielli me njeriun. Prej këndej poetët me të drejtë e quajnë “Pasqyrë e mendjes prej kah rrjedh jeta”, e asaj Mendjeje, që i ngarkoi Virgjërës së përvuajtur të Nazaretit detyra, të cilat nuk mund t’i përfshijë arsyeja. Mund t’i përfshijë vetëm zemra njerëzore. Këtë na nxit të meditojmë kjo ditë e parafundit e Nëntshes kushtuar Zojës së Papërlyer,
Lutja:
As dëbora nuk është
më e bardhë se ti!
As tingujt, më të këndshëm
se kënga jote,
o e Papërlyer,
mbi djepin e Hyjnisë!
Njerëzit veshimtë
i dëgjojnë tingujt
e shohin symbyllur
Shpellën e shkretë t’ Betlehemit:
Me mija vjet larg nesh,
e mija, pranë,
Pse shpella gjindet kudo,
e kudo grazhdi,
e gjindet Nëna e Zotit,
mbi krye të gjitha ferishteve:
“Dorë që lëmon ëmbël
burime tingujsh
përmbi mjerimet tona
e mbi lumninë, që na pret!”.