U mbajt në Suedi Takimi “Water and Faith”
R. SH. - Vatikan
“Uji e Feja” u quajt dita e organizuar nga WCC - Këshilli Botëror i Kishave – për të studiuar e për të kuptuar sesi mund të veprojnë grupet, institucionet dhe organizatat fetare, në bashkëpunim me sektorin publik e privat, për t’i siguruar “drejtësinë hidrike” mbarë njerëzimit. Ishte Dita e parë e javës 26-31 gusht, gjatë së cilës u diskutua rreth temës “Uji, ekosistemet dhe zhvillimi njerëzor”.
Aspekti ekumenik
Në seminarin, që përfundon nesër, folën ipeshkvi Arnold Temple, kryetar i rrjetit ekumenik të ujit në WCC dhe kryetar i Konferencës së Kishave të gjithë Afrikës, myftiu i Amman-it në Jordani, Muhammad Zoubi dhe përfaqësues të Vatikanit e të Kombeve të Bashkuara, që merren me ujin. Të pranishëm, më se 3.000 pjesëmarrës, ardhur nga 135 vende.
Temat e trajtuara
Ipeshkvi Temple, në fjalimin e mbajtur me këtë rast, kujtoi sesi në vitin 2016, WCC u bë “Bashkësi Blu”, për angazhimin e saj në mbrojtje të “arit blu”, parë si pasuri publike, që duhet mbrojtur edhe përmes zëvendësimit me ujin e rubinetit, duke pakësuar, kështu, përdorimin e shisheve prej plastike, me pasoja tejet të rrezikshme ndotjeje. U diskutua edhe për kontributin që mund të japin organizatat fetare për realizimin e Objektivit 6 të Kombeve të Bashkuara për Zhvillimin e Qëndrueshëm lidhur me sigurimin e përdorimit të ujit në strukturat higjieno -sanitare për të gjithë.
“Feja dhe Uji”, edicioni i tretë
Kujtojmë se është e treta herë që organziohet dita e hapur për pubklikun e urohet që bashkësitë fetare dhe organizmat e Kombeve të Bashkuara të bëjnë hapa domethënëse përpara, për ta përballuar së bashku “Objektivin 6”.
Po, si mund të bëhesh “Bashkësi Blu”? Misioni i “Bashkësive Blu” bazohet mbi tri detyra, që duhen respektuar: kush dëshiron të bëjë pjesë, duhet të respektojë të drejtën e njeriut për ujin, e drejtë e njohur nga OKB-ja në vitin 2010. Së dyti, të nxisë kontrollin publik mbi shërbimet hidrike, gjë që do të thotë se uji nuk duhet privatizuar. Së treti, të mos i përdorë shishet, atje ku uji është i pijshëm, ndërsa, ku nuk është i sigurt, duhen gjetur sisteme të tjera më ekologjike e të qëndrueshme. Industritë e shisheve të ujit prodhojnë rreth një milion shishe plastike në minut, e brenda vitit 2050, në oqeanet do të kemi më shumë shishe, sesa peshk. Prandaj WCC vendosi të bëjë pjesë në “Blue Community”.
Papa Françesku dhe takimi i Gjenevës
Duke kujtuar takimin Ekumenik të Papës Françesku me WCC, më 21 qershorin e kaluar, në Gjenevë, u fol edhe për dhuratat, që u shkëmbyen me atë rast: “Një nga dhuratat zyrtare, që iu bë Papës, ishte një shishe uji e thjeshtë prej qelqi, që përdoret në zyrat e WCC e gjatë konferencave. Ishte një shishe-mesazh. Ftesë për të kujtuar se edhe Vatikani duhet të bëhet anëtar i “Bashkësisë Blu”, edhe pse Papa Françesku, në Enciklikën “Lëvduar qofsh”, flet shpesh për ujin, si e drejtë njerëzore, me porosinë për ta mbrojtur në mbarë Planetin.
