Versioni Beta

Cerca

Vatican News
Bridge collapses on Genoa highway Bridge collapses on Genoa highway   (ANSA)

Shembet ura në Gjenova. Kisha në lutje për viktimat

“Po lutemi që të ketë sa më pak viktima, por gjë e vështirë, pasi zona është shumë e populluar”. Pohimi është i ipeshkvit ndihmës të Gjenovës, imzot Nicolò Anselmi, pas shembjes së urës Morandi në Gjenova.

R.SH. - Vatikan

Ditë dhimbjeje e ankthi, e sotmja, në Gjenova të Italisë. Shembet, në mesin e pallateve të banuara, ura Morandi, duke krijuar një skenar apokaliptik. Makina të shumta njëra mbi tjetrën, beton e hekur, që u shkërmoqën sikur të ishin kashtë e rërë, duke bërë të supozohej një bilanc jo i vogël viktimash. 22 të vdekur, por numri është i destinuar të rritet, ndërsa skuadrat e ndihmës së shpejtë punojnë për të nxjerrë njerëz nga rrënojat.

Hipotezat e rënies së urës

         Ura u shemb në mesditë. Hipotezat e para të shkaqeve të rënies, flasin, ndoshta, për fundosje strukture. Në çastin e tragjedisë, në zonë binte shi me rrëshekë. Sipas disa dëshmitarëve, ura është goditur nga rrufeja. E ndërtuar nga inxhinjeri Riccardo Morandi, e përuruar në vitin 1967, ura zgjatej për 1.182 metra e mbështetej mbi tri shtylla betonarme, që arrinin në 90 metra lartësi. Njëra prej tyre u shemb. Ndërsa autoritetet italiane bëjnë kontrollet e rastit, për t’u shënuar fakti se punimet për ristrukturimin e urës, nisur në vitin 2016, përfunduan vetëm pak kohë më parë.

Nesër, lutje në të gjitha kishat e Gjenovës

         Nesër, njofton kryeipeshkvi metropolit i Gjenovës, kardinali Angelo Bagnasco, “në të gjitha kishat e qytetit, edhe në përkim me festën liturgjike të Zojës së Madhe, meshtarët do t’i luten veçanërisht Shën Marisë Virgjër për viktimat. Nuk përjashtohet një funeral publik për to, në katedralen e Shën Lorencit, por më parë duhet verifikuar identiteti dhe prejardhja e tyre e, natyrisht, duhen pyetur familjarët. Kisha është sigurisht e hapur për të gjithë ata”.

14 gusht 2018, 14:39